നസ്രിയയുടെ ലക്കി അലിയാണ് ഞാന്‍, ഫഹദ് ഫാസില്‍ പറയുന്നു

മലയാള സിനിമയിലെ പ്രിയപ്പെട്ട താര ദമ്പതികളാണ് ഫഹദ് ഫാസിലും നസ്രിയ നസീമും. ഫഹദിന്റേതായി പുറത്തെത്തുന്ന ചിത്രങ്ങള്‍ക്ക് ആരാധകര്‍ക്ക് ഇടയില്‍ ഏറെ പ്രതീക്ഷയുമുണ്ട്. ഫഹദ് ചിത്രങ്ങള്‍ ഒരു മിനിമം ഗ്യാരന്റി ചിത്രങ്ങള്‍ എന്നാണ് ആരാധകര്‍ പറയുന്നതും. എന്നാല്‍ തന്റെ ചിത്രങ്ങള്‍ വിജയിക്കുന്നതില്‍ മാജിക്ക് ഒന്നുമില്ലെന്നും പലപ്പോഴും ഭാഗ്യമാണെന്നുമാണ് ഫഹദിന്റെ അഭിപ്രായം.

‘എന്റെ ഭാര്യ എന്നെ വിളിക്കുന്നത് ലക്കി അലി എന്നാണ്, കാരണം ഞാന്‍ വളരെ ഭാഗ്യമുള്ളയാളാണ്. കൃത്യമായ സ്ഥലത്ത് കൃത്യമായ സമയത്ത് എത്തിപ്പെടുകയാണ് ഞാന്‍. അല്ലാതെ മാജിക്കോ, എന്തെങ്കിലും റോക്കറ്റ് സയന്‍സോ ഇല്ല, എല്ലാം സംഭവിക്കുന്നതാണ്,’ ഫഹദ് പറയുന്നു. ഒരു മാധ്യമത്തിന് ഇന്ത്യയ്ക്ക് നല്‍കിയ അഭിമുഖത്തില്‍ സംസാരിക്കുകയായിരുന്നു ഫഹദ്.

അടുത്തിടെയായി മൂന്ന് ചിത്രങ്ങളാണ് ഫഹദിന്റേതായി പുറത്തെത്തിയത്. ഈ മൂന്നും ഒടിടി റിലീസ് ആയിരുന്നു. സീ യൂ സൂണ്‍, ഇരുള്‍, ജോജി എന്നീ മൂന്നു ചിത്രങ്ങളും ഏറെ ശ്രദ്ധ നേടുകയും ഫഹദ് നിരൂപക പ്രശംസ നേടുകയും ചെയ്തിരുന്നു. അല്ലു അര്‍ജുന്റെ പുതിയ ചിത്രത്തിലൂടെ തെലുങ്കിലും അരങ്ങേറ്റം കുറിക്കുകയാണ് ഫഹദ് എന്നു വാര്‍ത്തകളുണ്ട്. സംവിധായകന്‍ സുകുമാര്‍ ഒരുക്കുന്ന ചിത്രത്തില്‍ വില്ലനായാണ് ഫഹദ് എത്തുന്നത് എന്നാണ് റിപ്പോര്‍ട്ട്.