വീട്ടില്‍ കള്ളനോട്ടടി, സിഡിഎം മെഷീന്‍ നിക്ഷേപിച്ചതോടെ യുവാക്കൾക്ക് പിടിവീണു, കൂടുതൽ വിവരങ്ങൾ പുറത്ത്

മാറനല്ലൂര്‍ : പൂവച്ചല്‍ എസ്ബിഐയുടെ സിഡിഎം മെഷീനില്‍ കള്ളനോട്ട് കണ്ടെത്തിയ സംഭവത്തിൽ കുടുങ്ങിയത് വീട്ടില്‍ കള്ളനോട്ട് നിര്‍മാണം നടത്തിയിരുന്ന യുവാക്കൾ. പറണ്ടോടു കീഴ്‌വാലൂര്‍ വിനോഭ് ഭവന്‍ ഏന്തിവിള വീട്ടില്‍ ബിനീഷ്, ആര്യനാട് മുള്ളന്‍കല്ല് വിജയാഭവനില്‍ ജയന്‍ എന്നിവരാണ് പോലീസിന്റെ പിടിയിലായത്.

ബിനീഷിൻറെ ബന്ധുവായ ജയന്റെ വീട്ടിലെ ഒരു മുറിയിലാണ് നോട്ട് നിര്‍മാണത്തിനുള്ള സജ്ജീകരണങ്ങള്‍ ഒരുക്കി ബിനീഷ് നോട്ട് നിര്‍മിച്ചുവന്നത്. നൂറിന്റെയും അഞ്ഞൂറിന്റേയും നോട്ടുകള്‍ ആണ് ഇവര്‍ പ്രിന്റ് ചെയ്തിരുന്നത്. കഴിഞ്ഞ ദിവസം 500 ന്റെ എട്ടു നോട്ടുകള്‍ പൂവച്ചല്‍ എസ്ബിഐക്ക് സമീപമുള്ള സിഡിഎംഎയില്‍ നിക്ഷേപിച്ചതോടെയാണ് ഇടവരും പിടിയിലായത്.

സംഭവം ബാങ്ക് അധികൃതരുടെ ശ്രദ്ധയില്‍പ്പെട്ട് പണം നിക്ഷേപിച്ച അക്കൗണ്ട് കണ്ടെത്തി കാട്ടാക്കട പോലീസില്‍ പരാതി നല്‍കുകയുമായിരുന്നു. സിസിടിവി ദൃശ്യങ്ങളും അക്കൗണ്ട് വിവരങ്ങളും പരിശോധിച്ച് പോലീസ് നടത്തിയ അന്വേഷണത്തിലാണ് പ്രതികളെ പിടികൂടിയത്. പ്രിന്റ് ചെയ്ത ഉപയോഗശൂന്യമായ പേപ്പറുകളും കമ്പ്യൂട്ടര്‍, പ്രിന്റര്‍, സ്‌കാനര്‍, മഷി എന്നിവ ഉള്‍പ്പെടെയുള്ള തൊണ്ടി മുതല്‍ പോലീസ് കസ്റ്റഡിയില്‍ എടുത്തു.