ലോൺ ആപ്പ് സംഘം യുവതിയുടേയും കുട്ടികളുടേയും മോർഫ് ചെയ്ത ഫോട്ടോകൾ പ്രചരിപ്പിച്ചു, നാലംഗ കുടുംബം ജീവനൊടുക്കി.

ഭീമമായ പലിശ ഉൾപ്പടെ ലോൺ ആപ്പ് വഴി കൊടുത്ത പണം തിരികെ കിട്ടാനായി അനധികൃത ലോണ്‍ ആപ്പ് സംഘം വീട്ടമ്മയുടെയും കുട്ടികളുടേയും മോര്‍ഫ് ചെയ്ത ചിത്രങ്ങൾ വാട്സ് ആപ്പ് വഴി പ്രചരിപ്പിച്ചതിൽ മനം നൊന്ത് നാലംഗ കുടുംബം ആത്മഹത്യ ചെയ്തു. അനധികൃത ലോണ്‍ ആപ്പ് സംഘത്തിന്റെ ഭീഷണി സഹികെട്ടാണ് ആന്ധ്രയിൽ നാലംഗ കുടുംബം ആത്മഹത്യ ചെയ്തിരിക്കുന്നത്.

ശാന്തി നഗർ സ്വദേശികളായ രമ്യ ലക്ഷ്മി, ഭര്‍ത്താവ് കൊല്ലി ദുർഗാ റാവു മക്കളായ നാഗസായി, വിഖിത ശ്രീ എന്നവരാണ് ജീവനൊടുക്കിയത്. രണ്ട് മാസം മുമ്പാണ് ഇവർ മുപ്പതിനായിരം രൂപ ലോൺ ആപ്പ് സംഘത്തിൽ നിന്നും വാങ്ങിയിരുന്നത്. കഴിഞ്ഞ ദിവസങ്ങളിലായി പതിനായിരം രൂപ കുടുംബം തിരികെ അടക്കുകയും ഉണ്ടായി. എന്നാൽ തുക പലിശയടക്കം വീണ്ടും ഉയർന്നു വരുന്നതായാണ് ലോണ്‍ ആപ്പ് സംഘം അറിയിച്ചിരുന്നത്.

സംഘം പറയുന്നപോലെ പണം തിരികെ അടക്കാൻ കഴിയാതെ വന്നതോടെ ലോൺ ആപ്പ് സംഘം രമ്യ ലക്ഷ്മിയുടേയും മക്കളുടേയും ചിത്രങ്ങൾ മോർഫ് ചെയ്ത് പ്രചരിപ്പിക്കുകയായിരുന്നു. വീട്ടമ്മയുടെയും കുട്ടികളുടേയും മോര്‍ഫ് ചെയ്ത ചിത്രങ്ങൾ വാട്സ് ആപ്പ് വഴി പ്രചരിപ്പിച്ചത് ഇവരുടെ ബന്ധുക്കള്‍ക്കും കിട്ടി. ബന്ധുക്കൾ കാണിച്ച ചിത്രങ്ങൾ കണ്ടു കുടുംബം മനോവിഷമത്തിലാവുകയായിരുന്നു. തുടർന്നാണ് കുടുംബം ഒന്നടങ്കം ആത്മഹത്യ ചെയ്യുന്നത്.

ലോൺ ആപ്പ് സംഘങ്ങളുടെ ക്രൂരത മൂലം നിത്യവും മരണങ്ങൾ റിപ്പോർട്ട് ചെയ്യപ്പെടുന്ന സാഹചര്യമാണ് നിലവിലുള്ളത്. ഇതിനിടെ, രാജ്യത്ത് നിയമവിരുദ്ധമായി പ്രവർത്തിക്കുന്ന ലോൺ ആപ്പുകളെ നിയന്ത്രിക്കാൻ നടപടിയുമായി കേന്ദ്ര സർക്കാർ ഇറങ്ങിക്കഴിഞ്ഞു. നിയമവിധേയമായല്ലാതെ പ്രവർത്തിക്കുന്ന ലോൺ ആപ്പുകളെ പൂർണമായും തടയുമെന്ന് സർക്കാർ വ്യക്തമാക്കിയിട്ടുണ്ട്.

ഇതിനായി തുടക്കത്തിൽ നിയമാനുസൃതമായി പ്രവർത്തിക്കുന്ന ആപ്പുകളുടെ പട്ടിക തയ്യാറാക്കുകയാണ്. പട്ടിക തയ്യാറാക്കാൻ ആർബിഐയോട് ധനമന്ത്രാലയം ആവശ്യപ്പെട്ടുണ്ട്. തുടർന്ന് ആപ്പ് സ്റ്റോറുകളിൽ നിന്ന് മറ്റെല്ലാ നിയമ വിരുദ്ധ ആപ്പുകളും നീക്കാൻ നടപടിയെടുക്കും. ഇക്കാര്യം ഉറപ്പു വരുത്താൻ ഇലക്ട്രോണിക്സ് ആന്റ് ഇൻഫർമേഷൻ ടെക്നോളജി മന്ത്രാലയത്തിനും മോഡി സർക്കാർ നിർദേശം നൽകിയിരിക്കുകയാണ്.