പണം നല്‍കിയില്ല, മകളുടെ കാല്‍ പട്ടികയ്ക്ക് തല്ലിയൊടിച്ച് അച്ഛന്‍

പരവൂര്‍: മകളുടെ കാല്‍ തല്ലിയൊടിച്ച അച്ഛനെ പോലീസ് അറസ്റ്റ് ചെയ്തു. നെടുങ്ങോലം കൂനയില്‍ ബിന്ദു വിലാസത്തില്‍ അജയന്‍ എന്ന 47കാരനാണ് പോലീസ് പിടിയിലായത്. വീടു നിര്‍മ്മാണത്തിനായി സര്‍ക്കാരില്‍ നിന്നും ലഭിച്ച പണത്തിന്റെ പങ്കു ആവശ്യപ്പെട്ടിട്ട് കൊടുക്കാഞ്ഞതിനാണ് അജയന്‍ മകളുടെ കാല്‍ തല്ലി ഒടിച്ചത്.

മകള്‍ അഞ്ജുവിന്റെ കാലാണ് അജയന്‍ പട്ടിക ഉപയോഗിച്ച് അടിച്ചൊടിച്ചത്. അഞ്ജുവിന്റെ കാലിന്റെ അസ്ഥിക്ക് പൊട്ടലുണ്ട്. പെണ്‍കുട്ടി നെടുങ്ങോലം താലൂക്ക് ആശുപത്രിയില്‍ ചികിത്സയിലാണ്.

വീട് നിര്‍മാണത്തിനായി അഞ്ജുവിന് നഗരസഭയില്‍ നിന്നും സഹായം ലഭിച്ചിരുന്നു. വീടിന്റെ പണി ആരംഭിക്കുകയും ചെയ്തു. ഏറെ കാലമായി വീട്ടില്‍ നിന്നും മാറി പാരിപ്പള്ളിയില്‍ താമസിക്കുകയായിരുന്ന അജയന്‍ ധന സഹായം ലഭിച്ചതറിഞ്ഞ് വീട്ടില്‍ എത്തുകയും പണത്തിന്റെ പങ്ക് ആവശ്യപ്പെടുകയും ചെയ്തു. എന്നാല്‍ പണം നല്‍കാന്‍ അഞ്ജു സമ്മതിച്ചില്ല. തുടര്‍ന്ന് ഇയാള്‍ മകളെ അക്രമിക്കുകയായിരുന്നു. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.