അച്ഛൻ മരിച്ചത് അൾസർ മൂർച്ഛിച്ച്, കെഎം ഷാജിയെ തള്ളി കുഞ്ഞനന്തന്റെ മകൾ

കോഴിക്കോട്. ടിപി ചന്ദ്രശേഖരന്‍ വധക്കേസിലെ 13 പ്രതി പികെ കുഞ്ഞനന്തന്റെ മരണത്തില്‍ ദുരൂഹത ആരോപിച്ച കെഎം ഷാജിയെ തള്ളി കുഞ്ഞനന്തന്റെ മകള്‍. തിരഞ്ഞെടുപ്പ് തന്ത്രമാണ് ആരോപണമെന്ന് ഷബ്‌ന മനോഹരന്‍ പ്രതികരിച്ചു. കുഞ്ഞനന്തനെ കൊന്നത് യുഡിഎഫ് ഭരണാധികാരികളാണെന്നും ഷബ്‌ന പ്രതികരിച്ചു.

അള്‍സര്‍ മൂര്‍ച്ഛിച്ചാണ് അച്ഛന്‍ മരിച്ചത്. എന്നാല്‍ ചികിത്സ മനപ്പൂര്‍വ്വം യുഡിഎഫ് സര്‍ക്കാര്‍ വൈകിപ്പിച്ചു. അതിനാലാണ് അള്‍സര്‍ ഗുരുതരമായത്. എന്നാല്‍ എല്‍ഡിഎഫ് അധികാരത്തില്‍ എത്തിയപ്പോഴേക്കും രോഗം പാര്യമ്യത്തിലെത്തി. അച്ഛനെ യുഡിഎഫ് കൊന്നതാണെന്ന് അന്ന് തന്നെ ആരോപണം ഉയര്‍ന്നിരുന്നുവെന്നും ഷബ്‌ന പ്രതികരിച്ചു.

ഭക്ഷ്യ വിഷബാധയേറ്റാണ് ടിപി കേസില്‍ നേതാക്കളിലേക്ക് എത്താനുള്ള ഏക കണ്ണി മരിച്ചതെന്നായിരുന്നു ഷാജിയുടെ ആരോപണം. കണ്ണൂരിലെ എല്ലാ രാഷ്ട്രീയ കൊലപാതകങ്ങളിലും കൊന്നവര്‍ കൊല്ലപ്പെട്ടിട്ടുണ്ടെന്നും. രഹസ്യം ചോരുമോ എന്ന ഭയം വരുമ്പോഴാണ് കൊന്നവരെ കൊല്ലുന്നതെന്നും ഷാജി ആരോപിച്ചിരുന്നു.