നീതി ലഭിച്ചില്ല; ലീഗിനെ ശക്തമായി വിമര്‍ശിച്ച് എംഎസ്എഫ് ദേശീയ വൈസ് പ്രസിഡന്റ് ഫാത്തിമ തെഹ്ലിയ

ലീഗിനെതിരെ ആഞ്ഞടിച്ച് എംഎസ്എഫ് ദേശീയ വൈസ് പ്രസിഡന്റ് ഫാത്തിമ തെഹ്ലിയ. എംഎസ്എഫ് സംസ്ഥാന നേതാക്കള്‍ ഹരിത നേതാക്കള്‍ക്കെതിരെ നടത്തിയ ലൈഗീകാധിക്ഷേപത്തില്‍ മുസ്ലിം ലീഗില്‍ നിന്നും സ്വാഭാവിക നീതി ലഭിച്ചില്ലെന്ന് ഫാത്തിമ തെഹ്ലിയ ആരോപിച്ചു. ഹരിത എന്ന സംഘടനയെ ലീഗ് മരവിപ്പിച്ചതില്‍ വേദനയുണ്ടെന്നും നടപടി എടുക്കും മുമ്പ് ഹരിതയുടെ വിശദീകരണം കേട്ടില്ലെന്നും ഫാത്തിമ തെഹ്ലിയ വാര്‍ത്താ സമ്മേളനത്തില്‍ ആരോപിച്ചു.

പല ക്യാമ്പസുകളിലും എംഎസ്എഫിനെ നയിക്കുന്നത് ഹരിതയാണെന്നും കാണാമറയത്തിരിക്കുന്ന പെണ്‍കുട്ടികളുടെ ശബ്ദമാണ് ഹരിതയെന്നും ഒരുപാട് മേഖലകളില്‍ പെണ്‍കുട്ടികള്‍ക്കായി തങ്ങള്‍ പ്രവര്‍ത്തിക്കുന്നുണ്ടെന്നും ഫാത്തിമ മാധ്യമങ്ങളോട് പറഞ്ഞു. സഹിക്കാവുന്നതിന്റെ അങ്ങേയറ്റം സഹിച്ചെന്നും സ്ത്രീയാണെന്നുള്ള പരിഗണന പോലും നല്‍കാതെ ഇപ്പോളും സമൂഹമാധ്യമങ്ങളില്‍ വ്യക്തിഹത്യ തുടരുകയാണെന്നും ഫാത്തിമ ആരോപിച്ചു.

പി.കെ. നവാസ് ഉള്‍പ്പെടെയുള്ളവര്‍ക്കെതിരെ ലീഗിനും എംഎസ്എഫ് ദേശിയ നേതൃത്വത്തിനും പരാതി നല്‍കിയിരുന്നു. എംഎസ്എഫ് ദേശീയ നേതൃത്വം അന്വേഷണം നടത്തി റിപ്പോര്‍ട്ട് ലീഗ് നേതൃത്വത്തിന് നല്‍കിയിരുന്നതായും ഫാത്തിമ പറഞ്ഞു. പി.എം.എ സലാം ഉള്‍പ്പെടെ എല്ലാ നേതാക്കള്‍ക്കും പരാതി നല്‍കിയെന്നും എന്നിട്ടും നിരന്തരമുള്ള അസ്വസ്ഥതകളെ തുടര്‍ന്നാണ് വനിതാ കമ്മീഷനെ സമീപിച്ചതെന്നും ഫാത്തിമ പറഞ്ഞു.