കൊച്ചിയിൽ അറസ്റ്റ് ചെയ്ത യുവ നടനെയും എഡിറ്ററെയും പോലീസ് റോഡിലിട്ട് ചവിട്ടുന്ന ദൃശ്യങ്ങൾ പുറത്തുവന്നു

കൊച്ചി. കൊച്ചിയില്‍ യുവ നടനെയും എഡിറ്ററെയും പോലീസിനെ ആക്രമിച്ചെന്ന് ആരോപിച്ച് അറസ്റ്റ് ചെയ്ത സംഭവത്തില്‍ പോലീസിന്റെ വാദങ്ങള്‍ പൊളിയുന്നു. ഇരുവരെയും പോലീസ് റോഡിലിട്ട് ചവിട്ടുന്ന ദൃശ്യങ്ങള്‍ പുറത്തുവന്നതോടെയാണ് പോലീസിന്റെ വാദം പൊളിഞ്ഞത്. അതേസമയം സിഐ ഇവരുടെ മുഖത്ത് അടിച്ചതായും മൊബൈല്‍ ഫോണ്‍ എറിഞ്ഞ് തകര്‍ത്തതായും ആരോപണമുണ്ട്.

പോലീസ് കസ്റ്റഡിയില്‍ എടുത്ത ഇരുവരെയും പോലീസ് ജീപ്പിലേക്ക് കയറ്റന്നതിനിടെ നിലത്ത് വീണുപോയ രാഹുല്‍ രാജിനെയാണ് പോലീസ് ഉദ്യോഗസ്ഥന്‍ ബൂട്ടിട്ട് ചവിട്ടിയത്. പിന്നാലെ മൊബൈല്‍ ഫോണ്‍ നിലത്തെറിഞ്ഞ് തകര്‍ക്കുകയായിരുന്നു. തുടര്‍ന്ന് സ്ഥലത്ത് കൂടി നിന്നവരെ വിരട്ടിയോടിച്ചു. ഇതിന് ശേഷമാണ് ഇരുവരെയും പോലീസ് സ്‌റ്റേഷനിലേക്ക് കൊണ്ടുപോയത്.

അതേസമയം പോലീസ് നടത്തുന്ന അതിക്രമത്തിന്റെ ദൃശ്യങ്ങള്‍ പുറത്തുവന്നു. വാഹന പരിശോധനക്കിടെ ബ്ലാക്ക് ലിസ്റ്റില്‍ പെട്ട ബൈക്ക് കണ്ടെത്തിയെന്നും ഇതിന്റെ രേഖകള്‍ ചോദിച്ചപ്പോള്‍ ഇരുവരും ആക്രമിച്ചുവെന്നുമാണ് പോലീസ് പറയുന്നത്. യുവ നടനും എഡിറ്ററും കൊച്ചിയില്‍ സിനിമ ചിത്രീകരണത്തിന് എത്തിയതാണെന്നാണ് വിവരം.