തൊടുപുഴയിൽ അഞ്ഞൂറ് രൂപയുടെ കള്ളനോട്ടുകൾ പ്രചരിപ്പിക്കുന്നു.

ഇടുക്കി / പണമോഹികളായ രാജ്യ ദ്രോഹികൾ കേരളത്തിൽ അഞ്ഞൂറ് രൂപയുടെ കള്ളനോട്ടുകൾ പ്രചരിപ്പിക്കുന്നു. തൊടുപുഴയിലാണ് കള്ളനോട്ടുകൾ കൂടുതലായും വ്യാപാര കേന്ദ്രങ്ങളിൽ എത്തി വരുന്നത്. വ്യാപാരികളെയും പൊതുജനങ്ങളെയും ബാങ്ക് ജീവനക്കാരെയുമൊക്കെ കള്ളനോട്ടുകൾ വ്യാപകമാകുന്നത് ആശങ്കയിലാക്കി യിരിക്കുകയാണ്. ബാങ്കുകളിൽ പണമടയ്ക്കാൻ എത്തുമ്പോഴാണ് പലരും കബളിപ്പിക്കപ്പെട്ടത് തിരിച്ചറിയുന്നത്.

കഴിഞ്ഞ മൂന്നു മാസത്തിനിടെ നിരവധി പേര് കബളിപ്പിക്കപ്പെട്ടു. കള്ള നോട്ടിനും യഥാർത്ഥ കറൻസിയുടെ അതേ വലിപ്പമാണ് ഉള്ളത്. പെട്ടെന്ന് ആർക്കും നോട്ടുകൾ കണ്ടാൽ വ്യാജമാണെന്ന് മനസിലാകമെന്നില്ല. പിടികൂടിയ കള്ള നോട്ടുകളിൽ ആവട്ടെ റിസർവ് ബാങ്ക് എന്ന് എഴുതിയിരിക്കുന്നതിൽ റിസർവ് എന്നതിന്റെ അവസാന ഇംഗ്ലീഷ് അക്ഷരം ‘ഇ’ക്ക് പകരമായി ‘യു’ എന്നാണ് ഉള്ളത്. വാട്ടർമാർക്കിലും വ്യത്യാസം കാണുന്നുണ്ട്.

യഥാർഥ നോട്ടിൽ ഗാന്ധിജിയുടെ ചിത്രം വെള്ള നിറത്തിലാണ്. എന്നാൽ വ്യാജനിൽ ആവട്ടെ ഗാന്ധിയുടെ ചിത്രം വയലറ്റ് നിറത്തിലാണ്. കടകളിലാണ് കൂടുതലായും ഇത്തരം നോട്ടുകൾ എത്തുന്നത്. വിലക്കയറ്റം മൂലം വലഞ്ഞിരിക്കുന്ന കച്ചവടക്കാർ കള്ളനോട്ടുകളുടെ കെണിയിൽ പെട്ടാലും തങ്ങൾക്ക് വന്ന നഷ്ടവും പുറത്ത് പറയാനാവാതെ നശിപ്പിക്കുന്ന അവസ്ഥയിലാണുള്ളത്.