ഫ്രാങ്കോ മുളയ്ക്കൽ വീണ്ടും ജലന്ധർ രൂപതാധ്യക്ഷ പദവിയിലേക്ക് മടങ്ങിയെത്തുന്നു?

കന്യാസ്ത്രീയെ പീഡിപ്പിച്ചെന്ന കേസിൽ കുറ്റവിമുക്തനായ മുൻ ജലന്ധർ ബിഷപ് ഫ്രാങ്കോ മുളയ്ക്കൽ വീണ്ടും ചുമതലകളിലേക്ക് മടങ്ങിയെത്തുന്നു. ഫ്രാങ്കോ മുളയ്ക്കലിനെ കുറ്റവിമുക്തനാക്കി കൊണ്ടുള്ള കോടതി വിധി വത്തിക്കാൻ അംഗീകരിച്ചതോടെയാണ് ബിഷപ് ഫ്രാങ്കോ മുളയ്ക്കലിന് ചുമതലകളിലേക്ക് തുരികെ എത്താൻ അവസരമൊരുങ്ങിയിരിക്കുന്നത്.

2018 സെപ്റ്റംബറിലാണ് ബലാത്സംഗ കേസിൽ പ്രതിചേർത്തതിനെ തുടർന്ന് ബിഷപ് പദവിയിൽ നിന്ന് ഫ്രാങ്കോ മുളയ്ക്കലിനെ താൽക്കാലികമായി മാറ്റി നിർത്തുന്നത്. കേസില്‍ അദ്ദേഹത്തെ കോട്ടയം ജില്ലാ അഡീഷനല്‍ സെഷന്‍സ് കോടതി വെറുതെ വിടുകയായിരുന്നു. കോടതി വിധി വത്തിക്കാൻ അംഗീകരിച്ചതായി ആർച്ച് ബിഷപ്പ് ലിയോ പോൾഡോ വ്യക്തമാക്കിയതായി വാർത്താ ഏജൻസിയായ പിടിഐയാണ് റിപ്പോർട്ട് ചെയ്തിരിക്കുന്നത്.

ആർച്ച് ബിഷപ് ലിയോപോൾഡോ ഗിറെല്ലി ജലന്ധർ രൂപത സന്ദർശിച്ച വേളയിലാണ് വത്തിക്കാൻ ഫ്രാങ്കോ കേസിലെ കോടതി വിധി അംഗീകരിച്ചതായി അറിയിച്ചിരിക്കുന്നത്. ഇന്ത്യയുടെയും നേപ്പാളിന്‍റെയും ചുമതലയുള്ള ബിഷപ്പാണ് ലിയോപോൾഡോ ഗിറെല്ലി. ഫ്രാങ്കോ മുളക്കൽ നേരത്തെ വഹിച്ചിരുന്ന ജലന്ധർ ബിഷപ്പ് പദവിയിലേക്ക് തന്നെ ഫ്രാങ്കോ മടങ്ങിയെത്തുമോ എന്ന ചോദ്യത്തിന് അക്കാര്യം പോപ് തീരുമാനിക്കുമെന്നായിരുന്നു മറുപടി.

ഫ്രാങ്കോ കേസിലെ കോടതി വിധി വന്ന് നാല് മാസങ്ങൾക്ക് ശേഷമാണ് വത്തിക്കാൻ വിധി അംഗീകരിച്ചെന്ന റിപ്പോർട്ട് പുറത്ത് വന്നിരിക്കുന്നത്. വെറുതേ വിടുന്നു എന്ന ഒറ്റവരിയിലായിരുന്നു ജഡ്ജി ജി ഗോപകുമാര്‍ കേസിൽ വിധി പറഞ്ഞത്. ജലന്ധർ ബിഷപ്പായിരിക്കെ 2014നും 2016നും ഇടയിൽ കോട്ടയം കോൺവെൻറിലെത്തിയ പ്പോൾ തന്നെ പല തവണ പീഡിപ്പിച്ചുവെന്നായിരുന്നു ഫ്രാങ്കോ മുളക്കലിനെതിരെ കന്യാസ്ത്രീ നൽകിയ പരാതി നൽകിയിരുന്നത്. കുറ്റവിമുക്തനാക്കിയ വിചാരണ കോടതി വിധി ചോദ്യം ചെയ്ത് സർക്കാറും കന്യാസ്ത്രീയും ഹൈക്കോടതിയിൽ അപ്പീൽ നൽകിയിരിക്കുകയാണ്.