മാട്രിമോണിയിൽ പൈലറ്റെന്ന് വ്യാജ പ്രൊഫൈലുണ്ടാക്കി; വിവാഹാലോചന വഴി തട്ടിയത് ലക്ഷങ്ങൾ

തൃശ്ശൂർ വരന്തരപ്പിള്ളിയിൽ പൈലറ്റ് എന്ന് നടിച്ച് വ്യാജ പ്രൊഫൈൽ ഉണ്ടാക്കി വൈവാഹിക സൈറ്റുകൾ വഴി ലക്ഷങ്ങൾ തട്ടിയെടുത്തയാൾ അറസ്റ്റിൽ. വിവാഹാലോചന നടത്തിയാണ് നിരവധി സ്ത്രീകളിൽ നിന്നും ഇയാൾ ലക്ഷങ്ങൾ തട്ടിയിരുന്നത്. കേസിൽ മലപ്പുറം മൊറയൂർ ഒഴുകൂർ താഴത്തയിൽ മുഹമ്മദ് ഫസൽ (36) ആണ് അറസ്റ്റിലായത്.

ഇയാൾ അമൽ എന്ന പേരിൽ വ്യാജമായി പാസ്പോർട്ടും ആധാറും ഉണ്ടാക്കി, പൈലറ്റാണെന്ന് പറഞ്ഞാണ് വൈവാഹിക സൈറ്റുകളിൽ രജിസ്റ്റർ ചെയ്ത് വിവിധ ആളുകളിൽ നിന്ന് ഇയാൾ ലക്ഷങ്ങൾ തട്ടിയെടുത്തത്.

വിവാഹാലോചനകൾ നടത്തി പരിചയപ്പെടുന്ന യുവതികളിൽനിന്ന് ലക്ഷങ്ങൾ തട്ടിയെടുത്താണ് തട്ടിപ്പ് നടത്തിയിരുന്നത്. വരന്തരപ്പിള്ളി സ്വദേശിയായ യുവതിയിൽനിന്ന് 1,10,000 രൂപ തട്ടിയെടുത്തെന്ന പരാതിയിലാണ് അറസ്റ്റ്.

ഇയാൾ സംസ്ഥാനത്ത് പലയിടങ്ങളിലും ഇത്തരത്തിൽ തട്ടിപ്പ് നടത്തിയതായി പോലീസ് പറഞ്ഞു. എറണാകുളം പറവൂർ സ്വദേശിനിയിൽനിന്ന് ഏഴ് ലക്ഷം രൂപ തട്ടിയെടുത്തതായും കൊല്ലം, എറണാകുളം, മലപ്പുറം, വയനാട് എന്നിവിടങ്ങളിൽ സമാനമായ തട്ടിപ്പുകൾ നടത്തിയിട്ടുണ്ടെന്നും പോലീസ് അറിയിച്ചു.