കണ്ണൂരിൽ ഫ്രിഡ്ജ് പൊട്ടിത്തെറിച്ച് അപകടം; കുടുംബം രക്ഷപ്പെട്ടത് തലനാരിഴയ്ക്ക്

കണ്ണൂർ: കണ്ണൂർ അഴിക്കോട് ഫ്രിഡ്ജ് പൊട്ടിത്തെറിച്ച് വീടിന് തീ പിടിച്ചു. എഴുത്താണി സ്വദേശിനി ബിന്ദുവിന്റെ വീട്ടിലാണ് അപകടം ഉണ്ടായത്. അടുക്കളയിൽ നിന്ന് ഉച്ചത്തിലുളള ശബ്ദം കേട്ട് നോക്കിയപ്പോഴാണ് ഫ്രിഡ്ജ് പൊട്ടിത്തെറിച്ചതായി കണ്ടെത്തിയത്. ഈ . ഈ സമയം അടുക്കളയിൽ ആരും ഇല്ലാതിരുന്നതിനാൽ ആളപായം ഉണ്ടായില്ല.

തുടർന്ന് നാട്ടുകാരും അഗ്നിസുരക്ഷാ സേനയും സ്ഥലത്തെത്തി തീയണച്ചു. അപകടത്തിൽ വീടിന്റെ ചുമരുകൾക്ക് കേടുപാടുകൾ സംഭവിച്ചിട്ടുണ്ട്. എന്നാൽ തീപിടുത്തത്തിന്റെ കാരണം ഇതുവരെ വ്യക്തമായിട്ടില്ല. ഇത്രയും വലിയ അപകടത്തിൽ നിന്ന് കുടുംബം തലനാരിഴയ്ക്കാണ് രക്ഷപ്പെട്ടത്. ഇതിന് മുൻപും സമാനമായ സംഭവം സംസ്ഥാനത്ത് ഉണ്ടായിട്ടുണ്ട്.

മൂന്ന് ദിവസം മുൻപ് ആലപ്പുഴയിലും വീട്ടിൽ പ്രവർത്തിച്ചിരുന്ന ഫ്രിഡ്ജ് പൊട്ടിത്തെറിച്ച് അപകടം ഉണ്ടായിരുന്നു. റെയിൽവേ സ്റ്റേഷൻ വാർഡിൽ പൊഴിക്കടവിൽ ഷാജിയുടെ വീട്ടിലായിരുന്നു അപകടം. ശനിയാഴ്ച രാത്രി എട്ടോടെ മുറിക്കുള്ളിലിരുന്ന ഫ്രിഡ്ജ് പൊട്ടിത്തെറിക്കുകയായിരുന്നു. ഷീറ്റിട്ട മേൽക്കുര തകർന്നു.

ഭിത്തികളിൽ വിള്ളലുണ്ടായി. ചോർച്ച ഒഴിവാക്കാൻ ഉപയോഗിച്ചിരുന്ന ടാർഷീറ്റിനു തീപിടിച്ചത് അരമണിക്കൂറോളം പ്രദേശവാസികളെ ആശങ്കയിലാക്കി. ഇതിനിടെ വീട്ടിനുള്ളിലെ ഗ്യാസ് സിലിൻഡർ ഷാജിയുടെ മകൻ ബ്രിജിൽ പുറത്തേക്കു മാറ്റിയത് വൻ അപകടം ഒഴിവാക്കി. ഈ അപകടത്തിലും ആളപായം ഉണ്ടാകാതെ രക്ഷപ്പെട്ടു.