കാണാതായിട്ട് 37 വര്‍ഷം, പര്‍വതാരോഹകന്റെ മൃതദേഹം ആൽപ്‌സിൽ കണ്ടെത്തി

ബേൺ : പതിറ്റാണ്ടുകൾക്ക് മുൻപ് സ്വിറ്റ്സർലൻഡിലെ ആൽപ്‌സ് പർവതനിരകളിൽ നിന്നും കാണാതായ ജർമ്മൻ പർവ്വതാരോഹകന്റെ മൃതദേഹാവശിഷ്ടങ്ങൾ കണ്ടെടുത്തു. ജൂലായ് 12 ന് സെർമാറ്റിലെ തിയോഡൽ ഹിമാനിയിലേക്ക് സഞ്ചരിച്ച പർവ്വതാരോഹകരാണ് മൃതദേഹാവശിഷ്ടങ്ങൾ കണ്ടെത്തിയത്. മലനിരകളിലെഹിമാനി ഉരുകിയതോടെയാണ് മൃതദേഹം പുറത്തെത്തിയത്.ഡി.എന്‍.എ. പരിശോധനയില്‍, 1986 സെപ്റ്റംബറില്‍ കാണാതായ ജര്‍മന്‍ സ്വദേശിയായ പര്‍വതാരോഹകന്റെ മൃതദേഹമാണിതെന്ന് തിരിച്ചറിഞ്ഞു.

ഇദ്ദേഹം പർവതാരോഹണം കഴിഞ്ഞ് തിരിച്ചെത്താത്തതിനെ തുടർന്നുളള ഒരു കേസ് റിപ്പോർട്ട് ചെയ്തിട്ടുണ്ട് എന്നും പൊലീസ് പറഞ്ഞു. പർവതാരോഹകൻ ആരാണെന്ന വിവരം പൊലീസ് പുറത്തുവിട്ടിട്ടില്ല. ശരീരാവശിഷ്‌ടങ്ങളുടെ ചിത്രങ്ങൾ മാത്രമാണ് പുറത്തുവിട്ടി‌രിക്കുന്നത്. വേനൽകാലത്ത് ഹിമപാളികൾ ഉരുകുന്നതിനാൽ മിക്കവാറും ഇവിടെ അപകടങ്ങൾ പതിവാണ്. ഇതുമായി ബന്ധപ്പെട്ട് ഒട്ടനവധി കേസുകളും റിപ്പോർട്ട് ചെയ്തിട്ടുണ്ട്.

1968ൽ തകർന്നുവീണ വിമാനത്തിന്റെ അവശിഷ്ടങ്ങൾ കഴിഞ്ഞ വർഷം അലെറ്റ്ഷ് പർവതനിരകളിൽ നിന്നും കണ്ടെടുത്തിരുന്നു. 1970 ലെ മഞ്ഞുവീഴ്ചയിൽ മാറ്റർഹോണിൽ കാണാതായ രണ്ട് യുവജാപ്പനീസ് പർവതാരോഹകരുടെ അവശിഷ്ടങ്ങളും 2015ൽ കണ്ടെടുത്തിരുന്നു. ഡിഎൻഎ പരിശോധനയിലൂടെ ഇവരാണെന്ന് സ്ഥിരീകരിക്കുകയായിരുന്നു.