അയോദ്ധ്യ വിധിക്കായി വന്നപ്പോള്‍ ഇന്ത്യക്കാര്‍ ഗൂഗിളില്‍ തിരഞ്ഞത് ഇതാണ്

അയോദ്ധ്യ കേസില്‍ ചരിത്രവിധിക്കായി രാജ്യം തയാറായപ്പോള്‍ ഗൂഗിളില്‍ ഇന്ത്യക്കാര്‍ തിരഞ്ഞ ചോദ്യങ്ങള്‍ വ്യത്യസ്ഥമായിരുന്നു. വെള്ളിയാഴ്ച രാത്രിയാണ് അപ്രതീക്ഷിതമായി ശനിയാഴ്ച രാവിലെ 10.30ന് അയോദ്ധ്യക്കേസില്‍ സുപ്രീംകോടതി വിധി പ്രഖ്യാപിക്കുമെന്ന അറിയിപ്പ് എത്തുന്നത്. ഇതിനു പിന്നാലെ ചരിത്രവിധി പ്രഖ്യാപിക്കുന്ന ശനിയാഴ്ച അവധി ആയിരിക്കുമോ എന്നാണ് ഭൂരിഭാഗംആളുകളും ഗൂഗിളില്‍ തിരഞ്ഞത്. ചില സംസ്ഥാനങ്ങളില്‍ നവംബര്‍ 11 വരെ സ്‌കൂളുകള്‍ക്കും മറ്റ് വിദ്യാഭ്യാസ സ്ഥാപനങ്ങള്‍ക്കും സര്‍ക്കാര്‍ അവധി പ്രഖ്യാപിച്ചിരുന്നു. ഇതുകൂടാതെ മിക്കയിടങ്ങളിലും മദ്യ വില്‍പ്പനയ്ക്കും വിലക്കേര്‍പ്പെടുത്തിയിരുന്നു.

അവധി തിരഞ്ഞതിനു പിന്നാലെ ‘എന്താണ് 144-ാം വകുപ്പ്? ആരാണ് ചീഫ് ജസ്റ്റിസ് രഞ്ജന്‍ ഗൊഗോയ്?’ എന്നുളള ചോദ്യങ്ങളും തൊട്ടുപിന്നാലെ ഗൂഗിള്‍ സെര്‍ച്ചില്‍ ഇടംപിടിച്ചിരിക്കുന്നത്. ഉത്തര്‍പ്രദേശ്, ബെംഗളുരു, ജമ്മു എന്നിവിടങ്ങളില്‍ നിരോധനാഞ്ജ ഏര്‍പ്പെടുത്തിയത് സംബന്ധിച്ച വിവരങ്ങള്‍ക്കായാണ് ആളുകള്‍ തിരഞ്ഞത്. വിധിയോടനുബന്ധിച്ച്‌ രാജ്യത്തെ മിക്ക സംസ്ഥാനങ്ങളിലും നഗരങ്ങളിലും സി.ആര്‍.പി.സി 144ാം വകുപ്പ് ഏര്‍പ്പെടുത്തിയിരുന്നു. വകുപ്പ് അറിയുന്നതിനു പിന്നാലെ ചീഫ് ജസ്റ്റിസ് രഞ്ജന്‍ ഗൊഗോയിയെ ആണ് ആളുകള്‍ തിരഞ്ഞത്. ഏത് സംസ്ഥാനക്കാരന്‍ ആണെന്നും, ഏത് മതം എന്നിങ്ങനെ ഉള്‍പ്പെടെയുള്ള വിവരങ്ങളാണ് ഗൂഗിളില്‍ തിരയപ്പെട്ടത്. രാമജന്മഭൂമി- ബാബറി മസ്ജിദ് തര്‍ക്ക വിഷയത്തില്‍ ഏകകണ്ഠമായാണ് ചീഫ് ജസ്റ്റിസ് രഞ്ജന്‍ ഗൊഗോയ് അധ്യക്ഷനായ ഭരണഘടന ബെഞ്ച് നിര്‍ണായക വിധി പ്രസ്താവിച്ചത്.