ഗവർണറെ പിന്തുടർന്ന് എസ്‍എഫ്ഐ ​ഗുണ്ടകളുടെ ആക്രമണശ്രമം , 14പേർ അറസ്റ്റിൽ

തൃശൂർ: തൃശൂർ എങ്ങണ്ടിയൂരിൽ ഗവർണർക്ക് വീണ്ടും എസ്എഫ്ഐയുടെ കരിങ്കൊടി പ്രതിഷേധം. ഗവർണർ ആരിഫ് മുഹമ്മദ് ഖാനെ പിന്തുടർന്ന് എസ്എഫ്ഐക്കാർ പാഞ്ഞടുത്ത് ആക്രമിക്കാൻ ശ്രമിച്ചു. വനിതാ നേതാക്കളടക്കം 14 പേരെ പൊലീസ് അറസ്റ്റ് ചെയ്തു.

ചരിത്ര എഴുത്തുകാരൻ വേലായുധൻ പണിക്കശ്ശേരിയുടെ നവതി ആഘോഷത്തിന്റെ ഭാ​ഗമായി സംഘടിപ്പിച്ച പരിപാടി ഉദ്ഘാടനം ചെയ്യുന്നതിനെത്തിയതായിരുന്നു ​ഗവർണർ. കഴിഞ്ഞ ദിവസം പാലക്കാട്ടും എസ്എഫ്ഐക്കാർ ​ഗവർണർക്ക് നേരെ ആക്രമണത്തിന് മുതിർന്നിരുന്നു. കഞ്ചിക്കോട് സ്വകാര്യ പരിപാടിയിൽ പങ്കെടുക്കാൻ പോകുന്നതിനിടെയാണ് ഗവർണർക്കെതിരെ കരിങ്കൊടിയുമായി എസ്‍എഫ്ഐ ​ഗുണ്ടകളെത്തിയത്. കരിങ്കൊടി കാണിച്ചവരെ പോലീസ് അറസ്റ്റ് ചെയ്ത് നീക്കിയിരുന്നു.

അതേസമയം സ്ഥലത്ത് ബിജെപി പ്രവർത്തകരും എസ് എഫ് ഐ പ്രവർത്തകരും തമ്മിൽ കൈയ്യേറ്റമുണ്ടായി. എസ്എഫ്ഐ പ്രവർത്തകരെ ബിജെപി പ്രവർത്തകർ മർദിച്ചു. കഴിഞ്ഞദിവസവും, ഗവർണർ ആരിഫ് മുഹമ്മദ് ഖാനെ കരിങ്കൊടി കാണിച്ച് പ്രതിഷേധിച്ച 25 എസ്.എഫ്.ഐ. പ്രവർത്തകരെ പൊലീസ് കസ്റ്റഡിയിലെടുത്തു. മുളങ്കുന്നത്തുകാവില്‍ ആരോഗ്യ സർവകലാശാലയുടെ ബിരുദദാന ചടങ്ങിൽ പങ്കെടുക്കാനെത്തിയപ്പോഴാണ് വെളപ്പായ റോഡിൽ വെച്ച് എസ്.എഫ്.ഐ. പ്രവർത്തകർ ഗവർണറെ കരിങ്കൊടി കാണിച്ചത്.

വനിതാ പ്രവർത്തകർ ഉൾപ്പെടെയുള്ള 25 എസ്.എഫ്.ഐക്കാരെയാണ് പോലീസ് പിടികൂടിയത്. ഗവർണറുടെ വാഹനവ്യൂഹത്തിനടുത്തെത്തിയായിരുന്നു എസ്.എഫ്.ഐ. പ്രതിഷേധം. സമരക്കാരുടെ മുഖത്തും കണ്ണിലും മർദിച്ചെന്നാരോപിച്ച് പൊലീസ് സ്റ്റേഷനിലും പ്രവർത്തകർ പ്രതിഷേധിച്ചു.