ഗവർണർമാർ ഭരണഘടനയ്ക്കനുസരിച്ച് പ്രവർത്തിക്കണം, എങ്കില്‍ വിവാദങ്ങള്‍ കുറയും’; ജസ്റ്റിസ് നാഗരത്ന

ന്യൂഡല്‍ഹി: ഗവര്‍ണര്‍ പദവി ഗൗരവമേറിയ ഭരണഘടനാ പദവിയാണ്. ഗവര്‍ണര്‍മാര്‍ ഭരണഘടനയ്ക്കനുസരിച്ച് പ്രവര്‍ത്തിക്കണമെന്ന് സുപ്രീംകോടതി ജസ്റ്റിസ് ബി വി നാഗരത്‌ന. നിയമസഭ പാസ്സാക്കിയ ബില്ലുകളില്‍ ഗവര്‍ണര്‍മാര്‍ ഭരണഘടനാപരമായ ഉത്തരവാദിത്വം നിര്‍വഹിക്കണം,എങ്കിൽ ഹര്‍ജികളുടെ എണ്ണം കുറയുമെന്നും അവര്‍ ചൂണ്ടിക്കാട്ടി.

ഹൈദരാബാദിലെ നാഷണല്‍ ലോ യൂണിവേഴ്സിറ്റി സംഘടിപ്പിച്ച കോടതിയും ഭരണഘടനയും എന്ന പരിപാടി ഉദ്ഘാടനം ചെയ്തു സംസാരിക്കുകയായിരുന്നു ജസ്റ്റിസ് ബി.വി നാഗരത്ന. ഗവര്‍ണര്‍മാരോട് എന്ത് ചെയ്യണമെന്നും ചെയ്യരുതെന്നും പറയുന്നത് തികച്ചും ലജ്ജാകരമാണ്. ഭരണഘടനയനുസരിച്ച് പ്രവര്‍ത്തിക്കണമെന്ന് അവരോട് പറയേണ്ട സമയം അതിക്രമിച്ചു.

കള്ളപ്പണം നിയമപരമായ പണമാക്കാനുള്ള നല്ല മാര്‍ഗമായിരുന്നു നോട്ട് അസാധുവാക്കലെന്നും ജസ്റ്റിസ് നാഗരത്ന അഭിപ്രായപ്പെട്ടു. അസാധുവാക്കിയതില്‍ 98 ശതമാനം പണവും റിസര്‍വ് ബാങ്കില്‍ തിരിച്ചെത്തി. പിന്നെയെങ്ങനെ കള്ളപ്പണം ഇല്ലാതാക്കല്‍ സാധ്യമാകുമെന്നും ജസ്റ്റിസ് നാഗരത്ന ചോദിച്ചു.

നോട്ട് അസാധുവാക്കല്‍ സംബന്ധിച്ച തീരുമാനം ഒരു ദിവസം വൈകിട്ട് പ്രഖ്യാപിക്കുകയും തൊട്ടടുത്ത ദിവസം മുതല്‍ അത് നടപ്പാക്കുകയുമാണ് ചെയ്തതെന്നും അവര്‍ ചൂണ്ടിക്കാട്ടി. ഗവര്‍ണര്‍മാരുമായി ബന്ധപ്പെട്ട നടപടികള്‍ കോടതികളുടെ പരിഗണനയിലേക്ക് കൊണ്ട് വരുന്നത് ഭരണഘടനയ്ക്ക് ഗുണകരമല്ലെന്നും ജസ്റ്റിസ് നാഗരത്ന അഭിപ്രായപ്പെട്ടു.