റോഡ് അപകട നിരക്ക് കുറയ്ക്കാൻ കഴിഞ്ഞില്ലെങ്കിൽ ഉദ്യോഗസ്ഥർക്ക് ‘അപകടം’

തിരുവനന്തപുരം∙ സ്വന്തം അധികാര പരിധിയിൽ റോഡ് അപകട നിരക്ക് നാലിലൊന്നായെങ്കിലും കുറയ്ക്കാൻ കഴിഞ്ഞില്ലെങ്കിൽ മോട്ടർവാഹന വകുപ്പ് ഉദ്യോഗസ്ഥർക്ക് ‘അപകടം’. ബന്ധപ്പെട്ട ഉദ്യോഗസ്ഥന്റെ സർവീസ് രേഖകളിൽ ഇതു ‘ഡി ഗ്രേഡ്’ ആയി രേഖപ്പെടുത്തും. സ്ഥാനക്കയറ്റത്തെയും അതു ബാധിക്കും.

വകുപ്പിലെ എല്ലാ എൻഫോഴ്സ്മെന്റ് ഉദ്യോഗസ്ഥർക്കും റോഡ് സുരക്ഷാ ഉദ്യോഗസ്ഥർക്കും ഇതു ബാധകമായിരിക്കുമെന്നും ഗതാഗത പ്രിൻസിപ്പൽ സെക്രട്ടറി കെ.ആർ.ജ്യോതിലാലിന്റെ ഉത്തരവിൽ പറയുന്നു.

സംസ്ഥാനത്തെ എല്ലാ റോഡുകളും എൻഫോഴ്സ്മെന്റ് ഉദ്യോഗസ്ഥർക്കും റോ‍ഡ് സുരക്ഷാ ഉദ്യോഗസ്ഥർക്കും ബ്ലാക്ക് സ്പോട്ട് അടിസ്ഥാനമാക്കി വീതിച്ചു നൽകിയിട്ടുണ്ട്. ആ അധികാര പരിധിയിലെ സ്ഥലത്തുള്ള അപകടമരണ നിരക്കാണു കുറച്ചു കൊണ്ടുവരേണ്ടത്.

25% എങ്കിലും കുറയ്ക്കാൻ കഴിഞ്ഞില്ലെങ്കിൽ കോൺഫിഡൻഷ്യൻ റെക്കോർഡുകളിൽ അഡ്വേഴ്സ് എൻട്രി ഡി ഗ്രേഡ് ചെയ്തു രേഖപ്പെടുത്തണമെന്നാണു കർശന നിർദേശം. എഎംവിഐ, എംവിഐ, ജോയിന്റ് ആർടിഒ, ആർടിഒ തുടങ്ങി എല്ലാ ഫീൽഡ് ഉദ്യോഗസ്ഥർക്കും ഇത് ബാധകമാണ്.