ഹൻസിക കാൽ തടവാൻ സമ്മതിക്കാഞ്ഞത് വിവാദമായി, റോബോ ശങ്കറിന്റെ പരാമർശത്തിൽ അസ്വസ്ഥയായി താരം

ഹൻസികയുടെ പുതിയ ചിത്രമായ പാര്‍ട്ണര്‍ സിനിമയുടെ ട്രെയിലർ ലോഞ്ചിനിടെ നടൻ റോബോ ശങ്കർ നടത്തിയ പരാമർശം തമിഴകത്ത് വിവാദമായി. സിനിമയിൽ ഹൻസികയുടെ കാൽ തടവുന്ന രംഗം ചെയ്യാൻ തന്നെ അനുവദിച്ചില്ലെന്നായിരുന്നു റോബോ ശങ്കർ പറഞ്ഞത്.

‘സിനിമയില്‍ ഒരു രംഗമുണ്ട്. ഹന്‍സികയുടെ കാല്‍ ഞാന്‍ തടവണം. ആ സീന്‍ ചെയ്യാന്‍ ഹന്‍സിക അനുവദിച്ചില്ല. ഞാനും ഡയറക്ടറും കെഞ്ചി ചോദിച്ചു. കാല്‍വിരല്‍ മാത്രമേ തടവൂ എന്ന് പറഞ്ഞു. പക്ഷേ പറ്റില്ലെന്ന് ഹന്‍സിക തീര്‍ത്ത് പറഞ്ഞു. ഹീറോ ആദി മാത്രമേ എന്നെ തൊടാവൂ. മറ്റാര്‍ക്കും പറ്റില്ലെന്ന് പറഞ്ഞു. ഹീറോ ഹീറോയാണെന്ന് അപ്പോഴാണ് മനസ്സിലായത്.’– റോബോ ശങ്കർ പറഞ്ഞത് ഇങ്ങനെയായിരുന്നു.

വിവാഹത്തിന് ശേഷം ഹൻസിക അഭിനയിക്കുന്ന തമിഴ് ചിത്രം പാർട്ണറിന്റെ പ്രചാരണ പരിപാടിക്കിടെയായിരുന്നു ഇത്. നടിയുടെ കാല്‌ തടവുന്ന രംഗം ചിത്രത്തിലുണ്ടായിരുന്നെങ്കിലും നടി അതിന് അനുവദിച്ചില്ലെന്നായിരുന്നു നടൻ പറഞ്ഞത്. ഇതു കേട്ട് വേദിയിലിരിക്കുന്ന നടി അസ്വസ്ഥയാകുന്നത് കാണാം.

ഇതൊരു തമാശയായെടുക്കണമെന്നു റോബോ ശങ്കർ പറഞ്ഞെങ്കിലും ഫലം ഉണ്ടായില്ല. റോബോ ശങ്കറിന്റെ വാക്കുകള്‍ കേട്ട് വേദിയിലിരുന്ന ഹന്‍സിക അസ്വസ്ഥയായി. ചിരിക്കാൻ ശ്രമിക്കുന്ന നടി ഇടയ്ക്ക് ഒപ്പമിരിക്കുന്ന നടൻ ആദി പിനിഷെട്ടിയോട് എന്തോ സംസാരിക്കുന്നുണ്ട്. റോബോ ശങ്കറിന്റെ പ്രസ്താവനയെ പറ്റി പരിപാടിയിലുണ്ടായ മാധ്യമ പ്രവര്‍ത്തകന്‍ ചോദ്യം ചെയ്തു. ഇത്തരം ആളുകളെ ഇനി വേദിയിൽ കയറ്റരുതെന്ന് റോബോ അപ്പോൾ മൈക്കിലൂടെ പറഞ്ഞു. തുടർന്ന് സിനിമയുടെ അണിയറപ്രവർത്തകർ വേദിയിൽ വച്ച് ക്ഷമാപണവും നടത്തുകയാണ് ഉണ്ടായത്.