കക്ഷിരാഷ്ട്രീയ ഭേദമന്യേ, നിറവ്യത്യാസമില്ലാതെ, മതഭേദമന്യേ, സാധാരണക്കാരായ മനുഷ്യര്‍ കേരളത്തില്‍ ഭരണത്തുടര്‍ച്ച ആഗ്രഹിക്കുന്നുവെന്ന് ഹരീഷ് പേരടി

മലയാളികളുടെ പ്രിയപ്പെട്ട നടനാണ് ഹരീഷ് പേരടി. നാടക വേദികളില്‍ നിന്നും സിനിമയില്‍ എത്തിയ താരത്തിന് കൈ നിറയെ ചിത്രങ്ങളാണ്. അന്യ ഭാഷാ ചിത്രങ്ങളിലും തിളങ്ങി നില്‍ക്കുകയാണ് നടന്‍. ഇപ്പോള്‍ കേരളം ഭരിക്കുന്ന ഇടതുപക്ഷ സര്‍ക്കാര്‍ വീണ്ടും അധികാരത്തില്‍ വരുമെന്ന് പറയുകയാണ് ഹരീഷ്. അത് തീര്‍ച്ചയായിട്ടും ഉണ്ടാകും എന്നും ഇടുപക്ഷ രാഷ്ട്രീയത്തില്‍ വിശ്വസിക്കുന്നവര്‍ മാത്രമല്ല ഇടതിന്റെ ഭരണത്തുടര്‍ച്ച് ആഗ്രഹിക്കുന്നതെന്നും ഹരീഷ് പേരടി പറഞ്ഞു. ഒരു മലയാള വാര്‍ത്ത മാധ്യമത്തിന് അനുവദിച്ച അഭിമുഖത്തിലാണ് ഹരീഷ് പേരടി തന്റെ അഭിപ്രായം വ്യക്തമാക്കിയത്.

ഹരീഷ് പേരടിയുടെ വാക്കുകള്‍ ഇങ്ങനെ, ‘എന്നെപോലെയുള്ള സാധാരണക്കാരായ ജനങ്ങളെല്ലാം ഭരണ തുടര്‍ച്ച പ്രതീക്ഷിക്കുന്നുണ്ട്. കക്ഷിരാഷ്ട്രീയ ഭേദമന്യേ, നിറവ്യത്യാസമില്ലാതെ, മതഭേദമന്യേ, സാധാരണക്കാരായ മനുഷ്യര്‍ അതാഗ്രഹിക്കുന്നു. മഹാമാരിയുടെ കാലത്തും പട്ടിണിക്കിടാതെ കൊണ്ടുപോയ ഒരു ജനകീയ സര്‍ക്കാരാണ്.’

‘സര്‍ക്കാരിനെതിരെ ഉന്നയിക്കപ്പെട്ട ആരോപണങ്ങള്‍ ആരോപണങ്ങളായി മാത്രം തുടരുകയാണ്. ആ സാഹചര്യത്തില്‍ സര്‍ക്കാര്‍ ജനക്ഷേമ പ്രവത്തനങ്ങളുമായി മുന്നോട്ട് പോകുകയാണ് ചെയ്തത്. കേരളത്തിന് പുറത്തുള്ള ആളുകളും ഇടതിന്റെ ഭരണം തുടരണം എന്നാണ് ആഗ്രഹിക്കുന്നത്. തങ്ങള്‍ക്ക് ഒരു തുടര്‍ച്ചയ്ക്കുള്ള സാദ്ധ്യത അവര്‍ കാണുന്നില്ല. പക്ഷെ ഇവിടെ ഒരു തുടര്‍ച്ച വേണമെന്നും അതൊരു തുടക്കമായിരിക്കുമെന്നും ഒറ്റപ്പെട്ട നിലയിലാണെങ്കിലും ഇന്ത്യയിലെ മറ്റ് സംസ്ഥാനങ്ങളിലെ ചിലരും കരുതുന്നു.’