കടുവയുടെ ആക്രമണത്തിൽ കർഷകൻ മരിച്ച സംഭവത്തിൽ പ്രതിഷേധിച്ച് തൊണ്ടർനാട് പഞ്ചായത്തിൽ ഹർത്താൽ

വയനാട്. കടുവയുടെ ആക്രമണത്തിൽ പരിക്കേറ്റ കർഷകൻ മരിച്ച സംഭവത്തിൽ പ്രതിഷേധിച്ച് തൊണ്ടർനാട് പഞ്ചായത്തിൽ വെള്ളിയാഴ്ച യുഡിഎഫ് ഹർത്താൽ. മരിച്ചയാളുടെ കുടുംബത്തിന് 50 ലക്ഷം രൂപ നഷ്ടപരിഹാരവും ആശ്രിതന് സർക്കാർ ജോലിയും നൽകണമെന്നും യുഡിഎഫ് ആവശ്യമുന്നയിക്കുന്നു.

വയനാട് മെഡിക്കൽ കോളേജിന്റെ ശോചനീയാവസ്ഥയാണ് മരണത്തിന് ഇടയാക്കിയതെന്നും സർക്കാരിന് ഉത്തരവാദിത്തത്തിൽ നിന്നും ഒഴിയാൻ പറ്റില്ലെന്നും യുഡിഎഫ് ആരോപിക്കുന്നു. രാവിലെ 6 മുതൽ വൈകിട്ട് 6 വരെയാണ് ഹർത്താൽ. തൊണ്ടർനാട്, തവിഞ്ഞാൽ പഞ്ചായത്തിലെ മുഴുവൻ വിദ്യാഭ്യാസ സ്ഥാപനങ്ങൾക്കും വെള്ളിയാഴ്ച്ച ജില്ലാ കളക്ടർ അവധി പ്രഖ്യാപിച്ചു. പഞ്ചായത്തുകളിൽ കടുവയുടെ സാന്നിധ്യം സ്ഥിരീകരിച്ച സാഹചര്യത്തിലാണ് അവധി.