ഇരട്ട ചങ്കൻ എന്ന് പറഞ്ഞു കേട്ടിട്ടല്ലേ ഉള്ളൂ, ഇവനാണ് ഒർജിനൽ ഇരട്ട ചങ്കൻ.

ഇരട്ട ചങ്കൻ എന്ന് പറഞ്ഞു കേട്ടിട്ടല്ലേ ഉള്ളൂ. ഒർജിനൽ ഇരട്ട ചങ്കും, അതായത് ഇരട്ട ഹൃദയവും ഇരട്ട ശ്വാസകോശവും എന്തിനു ഇരട്ടത്തലയുമുള്ള ഒരാൾ ലോകത്ത് 25 മത്തെ പിറന്നാളിന്റെ നിറവിലാണ്. ഇരട്ടത്തലയുള്ള ജാനസ് എന്ന കുഞ്ഞൻ എന്ന ആമയാണ് 25 മത്തെ പിറന്നാളിന്റെ നിറവിൽ. മനുഷ്യന്റെ കരുതൽ കൊണ്ട് പല പ്രതിസന്ധികളെയും അതിജീവിച്ച ആമയുടെ പിറന്നാൾ ആഘോഷപൂർവ്വം കൊണ്ടാടിയിരിക്കുകയാണ് ജനീവയിലെ നാച്വറൽ മ്യൂസിയത്തിലെ ആഞ്ചലിക്കയും സംഘവും.

ഇരട്ടത്തല മാത്രമല്ല ജാനസിന്റെ സവിശേഷതകൾ ഇരട്ട ഹൃദയവും ഇരട്ട ശ്വാസകോശവും ജാനസിനുണ്ട് എന്നതാണ് ശ്രദ്ധേയമായ പ്രത്യേകത. ശത്രുക്കൾ മുന്നിലെത്തുമ്പോൾ സാധാരണഗതിയിൽ ആമകൾക്ക് തല തോടിനുള്ളിലേക്ക് വലിച്ച് രക്ഷപെടാനുള്ള കഴിവുണ്ട്. എന്നാൽ ഇരട്ട തലയുള്ളതിനാൽ ജാനസിന് തല ഉള്ളിലേക്ക് വലിക്കാൻ കഴിയാറില്ല.

ജാനസിനു മനുഷ്യൻ ഇത്രയും കാലം നൽകിയ പരിഗണനയും കരുതലുമാണ് ആമക്ക് ജീവിക്കാൻ സഹായകമായത്. ഇടത്തേക്ക് നടക്കണോ വലത്തേക്ക് നടക്കണോയെന്ന കാര്യത്തിൽ പോലും ജാനസിന് പലപ്പോഴും ആശയക്കുഴപ്പം ഉണ്ടാവും. ഇങ്ങനെ തലകൾ തമ്മിൽ ചേർന്ന് ഉരഞ്ഞുണ്ടാകുന്ന മുറിവ് ഒഴിവാക്കാൻ വാസ്ലിൻ ഉപയോഗിച്ച് തലകൾ തടവി കൊടുത്തുവരുകയാണ് ഇപ്പോൾ.

ജാനസിന്റെ മൂത്രസഞ്ചിയിലെ കല്ല് 2020ൽ ഓപ്പറേഷനിലൂടെ നീക്കം ചെയ്തിരുന്നു. പഴങ്ങളും ജൈവ പച്ചക്കറികളുമാണ് ജാനസിന്റെ ഭക്ഷണം. ഗ്രീൻ ടീയിലും ചമോമൈലിലുമാണ് ആമ കുളിക്കാറുള്ളത്. നിത്യവും ഇപ്പോൾ മസാജും വാക്കിങ്ങും ഇപ്പോൾ ആവശ്യമാണ്.