വിശുദ്ധ അമ്മ ത്രേസ്യയുടെ തിരുനാൾ മഹോത്സവത്തിനായി ഒരുങ്ങി മയ്യഴി

വിശുദ്ധ അമ്മ ത്രേസ്യയുടെ തിരുനാൾ മഹോത്സവത്തിനായി മയ്യഴി ഒരുങ്ങിക്കഴിഞ്ഞു. ഇതിന് മുന്നോടിയായി പന്തൽ കാല്നാട്ടു കർമ്മം നടന്നു. പന്തൽ കാല്നാട്ടു കർമ്മം ഇടവക വികാരി ഫാ. വിൻസെന്റ് പുളിക്കലിന്റെ കർമികത്വത്തിൽ നടന്നു. ദക്ഷിണേന്ത്യയിലെ പ്രമുഖ തീർത്ഥാടന കേന്ദ്രമായ മാഹി സെൻ്റ്തെരേസ ദേവാലയത്തിലെ തിരുന്നാൾ മഹോത്സവം ഒക്ടോബർ 5 മുതൽ 22 വരെയാണ് നടക്കുക. ഇത് മയ്യഴിയുടെ ദേശീയ ഉത്സവമാണ്. ജാതി മത ഭേദമന്യേ ആയിരങ്ങളാണ് മയ്യഴിയമ്മയെ കണ്ട് വണങ്ങാൻ മാഹിയിൽ എത്തുക. ഒക്ടോബർ 5 ന് രാവിലെ പള്ളിയിലെ രഹസ്യ അറയിൽ സൂക്ഷിച്ചിരിക്കുന്ന തിരുസ്വരൂപം പൊതു വണക്കത്തിന് വെക്കുന്നതോടെ തിരുന്നാളിന് കൊടിയേറും.

അപ്പോൾ നഗരസഭയിൽ സൈറൺ മുഴങ്ങും. തിരുസ്വരൂപത്തിൽ മാല അർപ്പിക്കാൻ ഭക്തജനത്തിരക്കായിരിക്കും.14, 15 തീയ്യതികളിലാണ് പ്രധാന ചടങ്ങുകൾ നടക്കുക. 14 ന് രാത്രിയിൽ മയ്യഴിയമ്മയുടെ തിരുസ്വരൂപം വഹിച്ച് കൊണ്ട് നഗരപ്രദക്ഷിണം നടക്കും. നഗരപ്രദക്ഷിണത്തിൽ നാനാജാതി മതസ്ഥർ പങ്കെടുക്കും. നഗര പ്രദക്ഷിണം കടന്നു പോകുന്ന സ്ഥലങ്ങളിലെ ക്ഷേത്രങ്ങളിലെ പൂജാരിമാർ മയ്യഴിയമ്മയുടെ തിരുസ്വരൂപത്തിൽ മാല ചാർത്തും.15 ന് പുലർച്ചെ ശയന പ്രദക്ഷിണം നടക്കും.കേരളത്തിന് അകത്ത് നിന്നും പുറത്ത് നിന്നും മായി പതിനായിരങ്ങളാണ് തിരുന്നാൾ ആഘോഷത്തിനായി മാഹിയിൽ എത്തുക. 22 ന് ഉച്ചയ്ക്ക് തിരുസ്വരൂപം രഹസ്യ അറയിൽ സൂക്ഷിക്കുന്നതോടെ തിരുന്നാൾ മഹോത്സവം സമാപിക്കും.

കോഴിക്കോട് ജില്ലയിലെ മുൻ കാല പോക്കറ്റടിക്കാരൻ്റെ പോക്കറ്റടി സംഘം മാഹിയിൽ ക്യാമ്പ് ചെയ്യുന്നതായി വിവരം ഉണ്ട്. തിരുന്നാളിനോടനുബന്ധിച്ച് മാഹിയിൽ പോലീസ് സുരക്ഷയും ശക്തമാക്കി. പോലീസ് സൂപ്രണ്ട് രാജശേഖര വള്ളാട്ട്, സി.ഐ.മാരായ ഷൺമുഖം ,ബി.ബി.മനോജ് എന്നിവരുടെ നേതൃത്വത്തിൽ ക്രൈം സ്ക്വാഡ് 24 മണിക്കൂറും മാഹിയിൽ ക്യാമ്പ് ചെയ്യും.തിരുന്നാൾ ദിനത്തിൽ കൂടുതൽ പോലീസ് സംഘവും പുതുച്ചേരിയിൽ നിന്ന് മാഹിയിൽ എത്തും.