കൂലി നൽകാൻ പണമില്ല, പകരം ടിവി നൽകി, പിന്നാലെ വീട്ടുജോലിക്കാരിയുടെ മാല കവർന്ന് വീട്ടുടമകൾ

കോട്ടയം : കൂലി നൽകാൻ പണമില്ലാത്തതിനാൽ വീട്ടുജോലിക്കാരിക്ക് ടിവി നൽകിയ വീട്ടുടമകൾ കവർന്നത് വീട്ടമ്മയുടെ സ്വർണമാല. സംഭവത്തിൽ ദമ്പതിമാരടക്കം മൂന്നുപേർ അറസ്റ്റിൽ. എറണാകുളം മരട് ആനക്കാട്ടിൽ വീട്ടിൽ ആഷിക് ആന്റണി (31), ഭാര്യ നേഹാരവി (35), എറണാകുളം പെരുമ്പടപ്പിൽ വാടകയ്ക്ക് താമസിക്കുന്ന ആലപ്പുഴ അരൂർ ഉള്ളാറക്കളം വീട്ടിൽ അർജുൻ (22) എന്നിവരെയാണ് അറസ്റ്റിലായത്.

ജോലി ചെയ്ത വകയിൽ ശമ്പള കുടിശ്ശിക കിടക്കു​കയും നിലവിൽ തരാൻ കയ്യിൽ പണമില്ലാത്തതിനാൽ വീട്ടിലിരി​ക്കുന്ന ടി.വി എടുത്തിട്ട് ശമ്പള കുടിശ്ശിക കുറച്ച്, ബാക്കി എനിക്ക് 8000 രൂപ തന്നാൽ മ​തിയെന്ന് ആഷിക് പറയുകയും ഇതിന് വീട്ടമ്മ സമ്മതിക്കുകയുമായിരുന്നു. കോട്ടയം അയ്മനം സ്വദേശിനിയായ വീട്ടമ്മയുടെ രണ്ടുപവന്റെ മാലയാണ് മോഷ്ടിച്ചത്. ഒക്ടോബർ 16-നായിരുന്നു സംഭവം.

അടുത്തദിവസം ടി.വി. ഫിറ്റ്ചെയ്യുന്നതിനായി ആഷിക്കും ഭാര്യയും സുഹൃത്തായ അർജുനും വീട്ടമ്മയുടെ കോട്ടയത്തെ വീട്ടിലെത്തി. ടി.വി. ഫിറ്റ് ചെയ്യുന്നതിനിടെ വീട്ടമ്മയുടെ മുറിയിൽ സൂക്ഷിച്ചിരുന്ന മാല മോഷ്ടിച്ചെന്നാണ് ആരോപണം. ഒളിവിൽ കഴിഞ്ഞു വന്നിരുന്ന ആ​ഷി​കി​നെയും ഭാര്യയെയും പഴനിയിൽ നിന്നും, അർജുനെ എറണാകുളത്തുനിന്നും പിടി​കൂ​ടി.

എസ്.എച്ച്.ഒ പ്രശാന്ത് കു​മാർ അ​റ​സ്റ്റി​ന് നേ​തൃത്വം നൽകി. ആ​ഷി​കിന് കളമശ്ശേരി, കോട്ടയം വെസ്റ്റ്, മൂവാറ്റുപുഴ എന്നീ സ്റ്റേഷനുകളിൽ ക്രിമിനൽ കേസ് നിലവിലുണ്ട്. കോടതിയിൽ ഹാജരാക്കിയ ഇവരെ റി​മാൻഡ് ചെയ്തു.