പ്രധാനമന്ത്രി എത്ര വിദേശ യാത്ര നടത്തുന്നു? UAE യാത്രക്ക് കേന്ദ്രം അനുമതി നൽകാഞ്ഞ മനോവിഷമത്തിൽ മരുമകൻ മന്ത്രി

കോഴിക്കോട് . മുഖ്യമന്ത്രി പിണറായി വിജയന്റെയും മന്ത്രിമാരുടെയും UAE യാത്രക്ക് കേന്ദ്രം അനുമതി നൽകാഞ്ഞ മനോവിഷമത്തിൽ മരുമകൻ മന്ത്രി പി.എ മുഹമ്മദ് റിയാസ്. മന്ത്രിമാര്‍ നടത്തുന്ന വിദേശയാത്രകളെ ന്യായീകരിച്ച പി.എ മുഹമ്മദ് റിയാസ്, വിദേശ യാത്രകൾ ഒരിക്കലും മോശം കാര്യമല്ലെന്നു കോഴിക്കോട് പറഞ്ഞു.

ലോകം എന്തെന്ന് നേരിട്ട് മനസിലാക്കുക എന്നത് പ്രധാനമാണ്. ആദ്യമായിട്ടല്ല മന്ത്രിമാര്‍ വിദേശ യാത്രകൾ നടത്തുന്നത്. പ്രധാനമന്ത്രി ഒരുപാട് വിദേശ യാത്ര നടത്തുന്നതായും മുഹമ്മദ് റിയാസ് പറഞ്ഞു. സിപി എം പ്രസ്താവനയിൽ ജീവിക്കുന്ന പാർട്ടിയല്ല. നാവിന്റെ വലുപ്പം കൊണ്ട് മാത്രം രാഷ്ട്രീയ നടത്തുന്ന പാർട്ടിയുമല്ല. മറിച്ച് രാഷ്ട്രീയ പ്രശ്നങ്ങളിൽ ചടുലമായി ഇടപെടുന്ന പാർട്ടിയാണിത്. രാഷ്ട്രീയ ലാഭത്തിനല്ല സിപിഎം ഉത്തരവാദിത്വങ്ങൾ ഏറ്റെടുക്കുന്നത് – റിയാസ് കോഴിക്കോട്ട് പറഞ്ഞു.

ഇതിനിടെ, അബുദാബി നിക്ഷേപക സംഗമത്തിൽ പങ്കെടുക്കാനുള്ള സംസ്ഥാന സർക്കാരിന്റെ പ്രതിനിധി സംഘം UAE യിലേക്ക് പുറപ്പെടുകയാണ്. യാത്രക്ക് മുഖ്യമന്ത്രി കേന്ദ്ര അനുമതി തേടിയെങ്കിലും നിഷേധിച്ചിരിക്കുകയാണ്. ഇതിന് പിന്നാലെ ചീഫ് സെക്രട്ടറിയും യാത്രയിൽ നിന്ന് പിന്മാറി. നോർക്ക, ഐടി, ടൂറിസം സെക്രട്ടറിമാരാകും നിക്ഷേപ സംഗമത്തിൽ പങ്കെടുക്കുക. അടുത്ത ബുധനാഴ്ച വരെയാണ് നിക്ഷേപ സംഗമം നടക്കുക.