തിരുവനന്തപുരത്ത് യുവതിക്ക് മദ്യം നല്‍കിയ ശേഷം ഭര്‍ത്താവും സുഹൃത്തുക്കളും ചേര്‍ന്ന് കൂട്ട ബലാത്സംഗം ചെയ്തു

സമ്പൂര്‍ണ സാക്ഷരര്‍ എന്ന് അവകാശപ്പെടുന്ന കേരളത്തില്‍ വീണ്ടും സ്ത്രീക്ക് നേരെ കൊടും ക്രൂരത. ഭര്‍ത്താവും സുഹൃത്തുക്കളും ചേര്‍ന്ന് യുവതിയെ കൂട്ട ബലാത്സംഗത്തിന് ഇരയാക്കി. തിരുവനന്തപുരം കണിയാപുരത്ത് ആണ് സംഭവം ഉണ്ടായത്. ഭര്‍ത്താവും സുഹൃതത്തുക്കളും ചേര്‍ന്ന് യുവതിയെ നിര്‍ബന്ധിച്ച് മദ്യം കുടുപ്പിച്ച ശേഷം കൂട്ട ബലാത്സംഗം ചെയ്തുവെന്നാണ് പരാതി. സംഭവത്തില്‍ ഭര്‍ത്താവിനെ പോലീസ് അറസ്റ്റ് ചെയ്തു. അബോധാവസ്തയില്‍ കണ്ടെത്തിയ യുവതിയെ ആശുപത്രിയില്‍ പ്രവേശിപ്പിച്ചു. യുവതി അതിക്രൂരമായി ഉപദ്രവിക്കപ്പെട്ടു എന്ന് ആശുപത്രി അധികൃതര്‍ വ്യക്തമാക്കി.

ഭര്‍ത്താവിനൊപ്പം ഭര്‍ത്താവിന്റെ വീട്ടിലാണ് കണിയാപുരം സ്വദേശിയായ യുവതി താമസിച്ചിരുന്നത്. യുവതി ഭര്‍ത്താവിനൊപ്പം പുതുക്കുറിച്ചിയില്‍ ബീച്ചില്‍ പോവുക പതിവായിരുന്നു. പല ദിവസങ്ങളിലും ഇരുവരും ഒന്നിച്ച് ബീച്ചില്‍ പോകും. വ്യാഴാഴ്ച വൈകുന്നേരം നാല് മണിയോടെ ബീച്ചിലേക്ക് എന്ന് പറഞ്ഞ് യുവതിയെ വാഹനത്തില്‍ കയറ്റി കൊണ്ടു പോയി. എന്നാല്‍ പുതുക്കുറിച്ചിയിലെ ഒരു വീട്ടിലേക്കാണ് ഭര്‍ത്താവ് യുവതിയെ കൊണ്ടുപോയത്.

ഈ വീട്ടില്‍ വെച്ച് ഭര്‍ത്താവും സുഹൃത്തുക്കളും മദ്യപിച്ചു. യുവതിയെയും നിര്‍ബന്ധിച്ച് മദ്യം കുടിപ്പിച്ചു. തുടര്‍ന്ന് ഭര്‍ത്താവും സംഘവും യുവതിയെ കൂട്ടബലാത്സംഗം ചെയ്യുകയായിരുന്നു എന്നാണ് പരാതി.

അതിനിടെ വീട്ടില്‍ നിന്നും എടുത്ത് ചാടി ഓടിയ യുവതി ഒരു വാഹനത്തിന് കൈകാണിച്ചു. ഇതോടെയാണ് സംഭവം നാട്ടുകാര്‍ അറിയുന്നത്. തുടര്‍ന്ന് നാട്ടുകാര്‍ യുവതിയെ കണിയാപുരത്തെ വീട്ടില്‍ എത്തിച്ചു. തുടര്‍ന്ന് പൊലീസ് എത്തി ഭര്‍ത്താവിനെ കസ്റ്റഡിയില്‍ എടുത്തു. യുവതിയെ ചിറയിന്‍കീഴ് ആശുപത്രിയിലേക്ക് മാറ്റിയിരിക്കുകയാണ്. യുവതി ഇപ്പോള്‍ അബോധാവസ്ഥയില്‍ തുടരുകയാണ്. അതിനാല്‍ പോലീസിന് മൊഴി എടുക്കാന്‍ കഴിഞ്ഞില്ല. യുവതിക്ക് ബോധം തെളിഞ്ഞാല്‍ മാത്രമേ ഇക്കാര്യത്തില്‍ കൂടുതല്‍ വിവരം ലഭ്യമാകൂ.