‘എനിക്കിപ്പോൾ 25 വയസേയുള്ളൂ,14 വർഷമല്ലേ ശിക്ഷ? എനിക്കൊന്നും നഷ്ടപ്പെടാനില്ല’ ഒരു കൂസലുമില്ലാതെ ശ്യാംജിത്ത്

കണ്ണൂര്‍. ‘എനിക്കിപ്പോൾ 25 വയസേയുള്ളൂ,14 വർഷമല്ലേ ശിക്ഷ? അത് ഗൂഗിളിൽ ഞാൻ കണ്ടിട്ടുണ്ട്. 39-ാം വയസിൽ പുറത്തിറങ്ങും. എനിക്കൊന്നും നഷ്ടപ്പെടാനില്ല’ നാടിനെയാകെ നടുക്കി വിഷ്ണുപ്രിയ എന്ന യുവതിയെ പ്രണപ്പകയില്‍ ക്രൂരമായി കൊലപ്പെടുത്തിയ ശ്യാംജിത്തിന്‍റെ വാക്കുകൾ കേട്ട് അന്വേഷണ ഉദ്യോഗസ്ഥൻമാർ പോലും ഞെട്ടി.

വിഷ്ണുപ്രിയ എന്ന യുവതിയെ പ്രണപ്പകയില്‍ ക്രൂരമായി കൊലപ്പെടുത്തി പൊലീസിന് മുന്നില്‍ വന്നിരിക്കുന്ന പ്രതി ശ്യാംജിത്തിനോട് പോലീസ് ചോദ്യങ്ങള്‍ ചോദിക്കുമ്പോഴാണ് ഇങ്ങനെ മറുപടി പറഞ്ഞത്. ഒരു കൂസലുമില്ലാതെയായിരുന്നു അന്വേഷണ സംഘത്തിന് മുന്നില്‍ ചെയ്ത കൊടും ക്രൂരത ശ്യാംജിത്ത് വിശദീകരിച്ചത്.

ഒരു ഇരുപത്തിയഞ്ചു വയസുകാരനായ യുവാവ് പോലീസുകാരുടെ മുന്നിലിരുന്ന് ഒരു കൂസലുമില്ലാതെ ചെയ്ത കൊലപാതകത്തെ കുറിച്ച് വിശദീകരിക്കുമ്പോൾ, അന്വേഷണ ഉദ്യോഗസ്ഥരുടെ പോലും മനസ് പതറുകയായിരുന്നു. വാക്കുകളില്‍ കൊടും ക്രൂരത ചെയ്തതിന്‍റെ ഒരു കുറ്റബോധവും ശ്യാംജിത്തിന്‌ ഉണ്ടായിരുന്നില്ല, മറിച്ച് ചോരയുടെ നിറമുള്ള പക മാത്രമായിരുന്നു വാക്കുകളിൽ ഉണ്ടായിരുന്നത്.

കേസില്‍ അറസ്റ്റിലായ ശ്യാംജിത്ത് വിഷ്ണുപ്രിയയെ കൂടാതെ മറ്റൊരു കൊലപാതകം കൂടെ ആസൂത്രണം ചെയ്തിരുന്നുവെന്ന വിവരം കൂടി പൊലീസിന് ലഭിച്ചിരിക്കുകയാണ്. വിഷ്ണുപ്രിയയുടെ പൊന്നാനി സ്വദേശിയായ സുഹൃത്തിനെയും കൊല്ലാനാണ് ശ്യാംജിത്ത് പദ്ധതിയിട്ടത്. ഇയാൾ വിഷ്ണുപ്രിയയുമായി പ്രണയത്തിലാണെന്ന് ശ്യാംജിത് സംശയിച്ചിരുന്നു. പ്രണയം തകർന്നതാണ് പകയിലേക്ക് എത്തിയത്. പ്രണയം പെൺകുട്ടി അവസാനിപ്പിച്ചതോടെ ശ്യാംജിത്തിന് സംശയം തുടങ്ങി. സുഹൃത്തുമായി പ്രണയത്തിലാണെന്ന് ശ്യാംജിത്ത് സംശയിച്ചു. ഇതോടെ വിഷ്ണുപ്രിയയെയും സുഹൃത്തിനെയും കൊല്ലാൻ തീരുമാനിക്കുകയായിരുന്നു.

സീരിയൽ കില്ലറുടെ കഥ പറയുന്ന മലയാളം സിനിമയായ അഞ്ചാംപാതിരയാണ് കൊലപാതകത്തിന് ശ്യാംജിത്തിന് പ്രചോദനമാവുന്നത്. ഇതിൽ സ്വന്തമായി കത്തിയുണ്ടാക്കുന്ന ഒരു രീതിയുണ്ട്. അത് കണ്ടാണ് കത്തി സ്വയമുണ്ടാക്കി കൊല നടത്താൻ തീരുമാനിക്കുന്നത്. വിഷ്ണുപ്രിയയുടെ പൊന്നാനിക്കാരനായ സുഹൃത്തിനെ സാക്ഷിയാക്കാനാണ് പൊലീസ് ഇപ്പോൾ ആലോചിക്കുന്നത്. ശ്യാംജിത്ത് എത്തുമ്പോൾ സുഹൃത്തുമായി വീഡിയോ കോളിൽ സംസാരിക്കുകയായിരുന്നു വിഷ്ണുപ്രിയ. പെൺകുട്ടിയെ തലക്കടിച്ച് വീഴ്ത്തുന്നത് സുഹൃത്ത് ഫോണിലൂടെ കണ്ടിരുന്നുവെന്നും പൊലീസ് പറയുന്നുണ്ട്.