കക്കൂസ് കഴുകാൻ വിടണമായിരുന്നു, പൈസയുണ്ടെങ്കിൽ വീട്ടിൽ നല്ലൊരു സ്വിമ്മിംഗ് പൂൾ പണിഞ്ഞ് അതിൽ കിടക്ക് സഞ്ചു ടെക്കിക്കെതിരെ മന്ത്രി

തിരുവനന്തപുരം : എംവിഡി നടപടികളെ വെല്ലുവിളിക്കുകയും പരിഹസിക്കുകയും ചെയ്‌ത യൂട്യൂബർ സഞ്ചു ടെക്കിക്കെതിരെ ഗതാഗത വകുപ്പ് മന്ത്രി കെബി ഗണേശ് കുമാർ. കയ്യിൽ പൈസയുണ്ടെങ്കിൽ വീട്ടിൽ നല്ലൊരു സ്വിമ്മിംഗ് പൂൾ പണിഞ്ഞ് രാവിലെയും വൈകീട്ടും നീന്തണമെന്ന് ഗണേശ് കുമാർ പറഞ്ഞു. എംവിഡിയെ വെല്ലുവിളിക്കേണ്ടെന്നും പഴയ കാലമല്ലെന്നും അദ്ദേഹം ഓർമ്മപ്പെടുത്തി.

അയാളുടെ വീഡിയോ കണ്ടപ്പോൾ എനിക്ക് തോന്നിയത് പണക്കൊഴുപ്പും അഹങ്കാരവുമാണ്. ഇയാൾ ഒരു നല്ല പൗരനാണെന്ന് എനിക്ക് തോന്നിയില്ല. എന്തും ഗോഷ്ടിയും കാണിച്ച് ആളുകളെ ആകർഷിക്കുന്നത്. ഒരു അന്തസിന് ചേർന്നതല്ല. അതൊക്കെ അദ്ദേഹത്തിന്റെ സംസ്‌കാരത്തിന്റെ ഭാഗമാണ്. അതൊക്കെ കയ്യിൽ വച്ചാൽ മതി. അയാളുടെ വാഹനവുമായി ബന്ധപ്പെട്ട എല്ലാ വീഡിയോകളും പരിശോധിക്കും. ലാഹനവുമായി ബന്ധപ്പെട്ട എന്തെങ്കിലും വേലത്തരമുണ്ടെങ്കിൽ എല്ലാത്തിനും നടപടിയെടുക്കും

റോഡിൽ ഇത്തരം വേലകൾ കാണിച്ചാൽ കർശന നടപടി സ്വീകരിക്കും. ഇത്തരം ആളുകളെ നിലയ്ക്ക് നിർത്തണമെന്ന് ഹൈക്കോടതിയുടെ കർശന നിർദ്ദേശമുണ്ട്. ഏറ്റവും കർശന നടപടി സ്വീകരിച്ച് ഹൈക്കോടതിക്ക് മുമ്പാകെ റിപ്പോർട്ട് സമർപ്പിക്കണമെന്നാണ് നിർദ്ദേശം. അവനവന്റെ പൈസയൊക്കെ പോക്കറ്റിൽ കിടന്നാൽ മതി. പൈസയുണ്ടെന്ന് കരുതി ആരെയെങ്കിലും കൊല്ലാൻ സാധിക്കുമോ. നിയമം ഒരു രാജ്യത്തിന് വേണ്ടിയുള്ളതാണ്.

എംവിഡി വിളിച്ച് ഉപദേശിച്ച് വിടുമ്പോഴും എന്റെ റീച്ച് പതിനായിരം കൂടി എന്നാണ് പറയുന്നത്. ഇത്തരം സാമൂഹ്യ വിരുദ്ധരെ പ്രോത്സാഹിപ്പിക്കുന്നതാണ് സംസ്‌കാരം എന്ന് കരുതരുത്. ഇത്തരം സാമൂഹ്യവിരുദ്ധന്മാരെ നമ്മൾ നിരുത്സാഹപ്പെടുത്തണം. എംവിഡിയെ വെല്ലുവിളിക്കാൻ നിൽക്കേണ്ട, ഇത് പഴയ കാലമല്ലെന്ന് ഞാൻ ആ സുഹൃത്തിനെ ഓർമ്മിപ്പിക്കുകയാണ്. ഇതുപോലെയുള്ള ആളുകളെ മെഡിക്കൽ കോളേജിലെ കക്കൂസ് കഴുകിക്കാൻ വിട്ടേക്കണം. അതാണ് ചെയ്യേണ്ടത്. ഇയാളുടെത് ക്രിമിനൽ നടപടികളാണ്. അതിന് ക്രിമിനൽ ശിക്ഷ തന്നെ നൽകണം. അയാളുടെ മുമ്പുള്ള വീഡിയോകൾ എല്ലാം പരിശോധിക്കാൻ ഉദ്യോഗസ്ഥർക്ക് നിർദ്ദേശം നൽകിയിട്ടുണ്ട്.’- ഗണേശ് കുമാർ പറഞ്ഞു.