ഉത്തരമറിയില്ലെങ്കിൽ എന്തെങ്കിലും എഴുതി വെച്ചാൽ മതി : പ്ലസ് ടു വിദ്യാർത്ഥികളോട് വിദ്യാഭ്യാസ ഡയറക്ടർ

പരീക്ഷയ്ക്ക് ഒന്നും അറിയില്ലെങ്കിൽ ഉത്തരക്കടലാസിൽ എന്തെങ്കിലും എഴുതിയാൽ മതിയെന്ന് ഡൽഹി വിദ്യാഭ്യാസ ഡയറക്ടർ കുട്ടികൾക്ക് ഉപദേശം നൽകുന്ന വീഡിയോ വൈറലായി. ഡൽഹി ഡയറക്ടർ ഓഫ് എജ്യുക്കേഷൻ(ഡിഒഇ) ഉദിത് റായിയാണ് പ്ലസ് ടു പരീക്ഷ എഴുതാൻ പോകുന്ന വിദ്യാർത്ഥികളോട് ഇങ്ങനെ പറഞ്ഞത്.

വീഡിയോ സാമൂഹിക മാദ്ധ്യമങ്ങളിൽ പ്രചരിച്ചതോടെ വിമർശനവുമായി നിരവധി പേരാണ് രംഗത്തെത്തിയത്. ഡൽഹിയിലെ സർക്കാർ സ്‌കൂളിലെ പ്ലസ് ടു വിദ്യാർത്ഥികൾക്കാണ് ഉദിത് റായി ഉപദേശം നൽകുന്നത്. ചോദ്യത്തിന്റെ ഉത്തരമറിയില്ലെങ്കിൽ എന്തെങ്കിലും എഴുതിയാൽ മതിയെന്നും മാർക്ക് കിട്ടുമെന്നുമാണ് ഉദിത് റായി പറയുന്നത്. ഉത്തരമെഴുതേണ്ട സ്ഥലം ഒഴിച്ചിടരുത്. ചോദ്യം അതുപോലെ പകർത്തിയെഴുതിയാലും മതി. ഉത്തരത്തിന്റെ സ്ഥാനത്ത് എന്ത് എഴുതിയാലും മാർക്ക് നൽകുമെന്ന് അദ്ധ്യാപകർ തന്നോട് പറഞ്ഞിട്ടുള്ളതായും ഉദിത് റായി പറഞ്ഞു.