‘ട്രംപിനെ നഗ്നനായി ഞാൻ കണ്ടിട്ടുണ്ട്, ഞാൻ ഭയപ്പെടുന്നില്ല’ നടി സ്റ്റോമി ഡാനിയേൽസ്

ന്യൂയോർക്ക് . മുൻ യു എസ് പ്രസിഡന്റ് ഡോണൾഡ് ട്രംപിനെ ഞാൻ ഭയപ്പെടുന്നില്ലെന്ന് നടി സ്റ്റോമി ഡാനിയേൽസ്. ‘ട്രംപിനെ നഗ്നനായി ഞാൻ കണ്ടിട്ടുണ്ട്. വസ്ത്രം ധരിച്ച അയാൾക്ക് അതിലപ്പുറം ഭയപ്പെടുത്താൻ കഴിയില്ല’ ബ്രിട്ടിഷ് ദിനപത്രമായ ‘ദ് ടൈംസ്’നു നൽകിയ അഭിമുഖത്തിൽ സ്റ്റോമി ഡാനിയേൽസ് പറഞ്ഞിരിക്കുന്നു. ഡോണൾഡ് ട്രംപിനെതിരെ മൊഴി നൽകുമോ എന്ന ചോദ്യത്തോടെ പ്രതികരിക്കുകയായിരുന്നു സ്റ്റോമി ഡാനിയേൽസ്.

ബന്ധം പുറത്തു പറയാതിരിക്കുന്നതിന് പോൺചിത്രങ്ങളിലെ നടിയായ സ്റ്റോമി ഡാനിയേൽസിനു പണം നൽകിയെന്ന കേസിൽ ട്രംപിനെതിരെ ന്യൂയോർക്ക് കോടതി കുറ്റം ചുമത്തിയ പിറകെയാണ് സ്റ്റോമിയുടെ പ്രതികരണം ഉണ്ടായിരിക്കുന്നത്. കലാപത്തിനു പ്രേരിപ്പിച്ച് ട്രംപ് ഇതിനകം മരണവും നാശവും വരുത്തി കടന്നുകളഞ്ഞയാളാണെന്നു യുഎസ് കാപ്പിറ്റോൾ ആക്രമണത്തെ ചൂണ്ടിക്കാട്ടി സ്റ്റോമി ഡാനിയേൽസ് പറയുന്നു. ഇനിയുണ്ടാകാൻ പോകുന്ന കാര്യങ്ങൾ അത്തരത്തിലുള്ളതായിരിക്കും – സ്റ്റോമി അഭിപ്രായപ്പെട്ടു.

‘വിധി എന്തുതന്നെയായാലും അത് ആക്രമണത്തിനു കാരണമാകും. പരുക്കുകളും മരണവും ഉണ്ടാകും. ഇതുകൊണ്ട് ഒരുപാട് നല്ല കാര്യങ്ങൾ ഉണ്ടാകാൻ സാധ്യതയുണ്ട്. പക്ഷേ ഒരുപാട് മോശം കാര്യങ്ങളും ഉണ്ടാകും.’– സ്റ്റോമി പറഞ്ഞു.’ട്രംപിനെതിരായ ആരോപണങ്ങളും തുടർന്നുള്ള കാര്യങ്ങളും പരസ്യമാക്കിയതിൽ ചിലപ്പോഴൊക്കെ എനിക്ക് ഖേദം തോന്നാറുണ്ട്’ – സ്റ്റോമി പറഞ്ഞു. ക്രിമിനൽ കേസിൽ കുറ്റം ചുമത്തപ്പെടുന്ന ആദ്യ യുഎസ് മുൻ പ്രസിഡന്റാണ് ട്രംപ്. ട്രംപിനോട് ഉടൻ കോടതിയിൽ കീഴടങ്ങാനാണ് മൻഹാറ്റൻ ഡിസ്ട്രിക്ട് അറ്റോർണി ആൽവിൻ ബ്രാഗ് കഴിഞ്ഞദിവസം ആവശ്യപ്പെട്ടിരുന്നത്.