പോത്തൻകോട് കല്ലൂരിൽ യുവാവിനെ വെട്ടിക്കൊലപ്പെടുത്തിയ ശേഷം വെട്ടിയെടുത്ത കാൽ റോഡിൽ വലിച്ചെറിഞ്ഞ സംഭവം: ഒരാൾ കസ്റ്റഡിയിൽ

പോത്തൻകോട് കല്ലൂരിൽ ഗുണ്ടാപകയെ തുടർന്നുള്ള കൊലപാതകവുമായി ബന്ധപ്പെട്ട് ഒരാൾ കസ്റ്റഡിയിൽ. സുധീഷിനെ വെട്ടിക്കൊലപ്പെടുത്തിയ 12 അംഗ സംഘത്തിലുള്ള ആളാണ് പിടിയിലായത്. മറ്റ് പ്രതികൾക്കായി വ്യാപക അന്വേഷണം ആരംഭിച്ചു. സംഭവത്തിന് പിന്നിൽ കുപ്രസിദ്ധ ഗുണ്ട ഒട്ടകം രാജേഷും സംഘവുമാണെന്നാണ് സംശയം. പ്രതികൾ എല്ലാവരേയും കുറിച്ചുള്ള വിവരങ്ങൾ ഉണ്ടെന്നും ഇന്ന് തന്നെ എല്ലാവരേയും കസ്റ്റഡിയിലെടുക്കുമെന്നും പോലീസ് അറിയിച്ചു. റൂറൽ എസ്.പി യുടെ നേതൃത്വത്തിലാണ് അന്വേഷണം നടക്കുന്നത്.

ഗുണ്ടാ സംഘങ്ങൾ തമ്മിലുള്ള കുടിപ്പകയാണ് കൊലപാതകത്തിന് കാരണം. വധശ്രമക്കേസിൽ ഒളിവിൽ കഴിഞ്ഞിരുന്ന സുധീഷിനെയാണ് ഗുണ്ടകൾ വെട്ടിക്കൊലപ്പെടുത്തിയതെന്ന് പോലീസ് അറിയിച്ചിരുന്നു. നൂറിലേറെ വെട്ടുകൾ സുധീഷിന്റെ ശരീരത്തിലുണ്ട്. സുധീഷിനെ തേടി പല വീടുകളിലും കയറിയിറങ്ങിയ സംഘം നേരത്തെ ഭീകരാന്തരീക്ഷം സൃഷ്ടിച്ചിരുന്നു.

ആറ്റിങ്ങൽ വധശ്രമക്കേസിലാണ് കൊല്ലപ്പെട്ട സുധീഷ് ഒളിവിൽ പോയത്. സുധീഷിന്റെ സഹോദരനടക്കം നാലുപേർ നേരത്തെ അറസ്റ്റിലായിരുന്നു. ഇന്നലെ ഉച്ചക്ക് രണ്ടരയോടെയായിരുന്നു 12 അംഗ ഗുണ്ടാസംഘത്തിന്റെ ആക്രണം. ഗുണ്ടാസംഘത്തെ കണ്ട് ബന്ധുവിന്റെ വീട്ടിലേക്ക് കയറിയ സുധീഷിനെ വീടിനകത്തിട്ട് വെട്ടുകയായിരുന്നു. വീട്ടിന്റെ ജനലുകളും വാതിലും തകർത്ത് ഭീകരാന്തരീക്ഷം സൃഷ്ടിച്ചശേഷമായിരുന്നു ആക്രമണം.

വാഹനത്തിലെത്തിയ സംഘം യുവാവിന്റെ കാൽ വെട്ടിയെടുത്തു. വെട്ടി മരണശയ്യയിലാക്കിയിട്ടും പകതീരാതെയാണ് കാൽപാദം വെട്ടിയെടുത്ത് ഗുണ്ടാസംഘം റോഡിലെറിഞ്ഞത്. സംഘത്തിലുണ്ടായിരുന്നവരിൽ ഒരാൾ മുറിഞ്ഞു പോയ കാലുമെടുത്ത് പുറത്തേക്ക് വരികയും ബൈക്കിൽ കയറി തിരിച്ചു പോകും വഴി റോഡിലേക്ക് വലിച്ചെറിയുകയുമായിരുന്നു. വെട്ടിയ കാൽ റോഡിലേക്ക് വലിച്ചെറിയുന്നതിന്റെ ദൃശ്യങ്ങൾ പുറത്തുവന്നിരുന്നു. ഗുരുതരമായി പരിക്കേറ്റ സുധീഷ് രക്തം വാർന്നാണ് മരിച്ചത്.