വയോധിക ദമ്പതികളെ കൊലപ്പെടുത്തിയ കേസ്, പ്രതി ബിസിനസ് തുടങ്ങാന്‍ പണം ആവശ്യപ്പെട്ട് വീട്ടില്‍ വഴക്കുണ്ടാക്കിയിരുന്നു

തൃശൂര്‍. വയോധിക ദമ്പതിമാരെ വടക്കാട് കൊലപ്പെടുത്തിയ കേസില്‍ പ്രതിയായ ചെറുമകന്റെ അറസ്റ്റ് രേഖപ്പെടുത്തി. കേസില്‍ ചെറുമകന്‍ അക്മലിന്റെ അറസ്റ്റാണ് രേഖപ്പെടുത്തിയത്. നായരങ്ങാടി സ്വദേശികളായ അബ്ദുള്ള ഭാര്യ ജമീല എന്നിവരാണ് കൊല്ലപ്പെട്ടത്. ചൊവ്വാഴ്ച പ്രതിയെ കൃത്യം നടന്ന വീട്ടില്‍ എത്തിച്ച് തെളിവെടുപ്പു നടത്തിയിരുന്നു.

പ്രതി ഇരുവരെയും കഴുത്തറത്താണ് കൊലപ്പെടുത്തിയതെന്നും കുറ്റം പ്രതി സമ്മതിച്ചതായും പോലീസ് പറഞ്ഞു. മയക്കുമരുന്നിന് അടിമയായ അക്മല്‍ തിങ്കളാഴ്ച പുലര്‍ച്ചെയാണ് അബ്ദുള്ളയെയും ജമീലയെയും കൊലപ്പെടുത്തയത്. തിങ്കളാഴ്ച രാവിലെ ദമ്പതികളുടെ മകന്‍ ഭക്ഷണവുമായി വീട്ടില്‍ എത്തിയപ്പോഴാണ് കൊലപാതകം നടന്നത് പുറത്ത് അറിയുന്നത്.

കൊലപാതകം നടത്തിയ ശേഷം പ്രതി കടന്നുകളഞ്ഞിരുന്നു എന്നാല്‍ പോലീസ് പ്രതിയെ മംഗലാപുരത്ത് നിന്നും പിടികൂടുകയായിരുന്നു. ജമീലയെ കൊലപ്പെടുത്തിയ ശേഷം സ്വര്‍ണാഭരണങ്ങള്‍ പ്രതി കൈക്കലാക്കിയിരുന്നു. സ്വര്‍ണാഭരണം വില്‍ക്കാന്‍ ശ്രമിക്കുന്നതിനിടെയാണ് പ്രതി പോലീസ് പിടിയിലായത്. മുമ്പ് ബിസിനസ് തുടങ്ങള്‍ പണം ആവശ്യപ്പെട്ട് പ്രതി വീട്ടില്‍ വഴക്കുണ്ടാക്കിയതായി സൂചനയുണ്ട്. പണത്തിന് വേണ്ടിയാണ് പ്രതി കൊലപാതകം നടത്തിയത്.