യാത്രക്കാരെ കയറ്റാതെ വിമാനം യാത്ര പുറപ്പെട്ട സംഭവം; ഗോ ഫസ്റ്റിന് 10 ലക്ഷം രൂപ പിഴ

ന്യൂഡൽഹി. ടിക്കറ്റെടുത്ത യാത്രക്കാരെ കയറ്റാതെ വിമാനം യാത്ര പുറപ്പെട്ട സംഭവത്തിൽ ഗോ ഫസ്റ്റ് വിമാനത്തിന് ഡിജിസിഎ 10 ലക്ഷം രൂപ പിഴ ചുമത്തി. വിമാനക്കമ്പനിയുടെ ഭാഗത്തു ഗുരുതര വീഴ്ചയുണ്ടായെന്നു ഡിജിസിഎ നടത്തിയ അന്വേഷണത്തിൽ വ്യക്തമായതോടെയാണു നടപടി. ടെർമിനൽ കോഓർഡിനേറ്ററുമായുള്ള ആശയവിനിമയത്തിൽ വിമാനക്കമ്പനി ജീവനക്കാരുടെ ഭാഗത്തുനിന്നു വൻവീഴ്ചയുണ്ടായി.

വേണ്ടത്ര ഗ്രൗണ്ട് ഹാൻഡിലിങ് ജീവനക്കാരെ നിയമിക്കുന്നതിൽ കമ്പനി പരാജയപ്പെട്ടെന്നും അന്വേഷണത്തിൽ കണ്ടെത്തി. ജനുവരി 9നു ബെംഗളുരുവിൽനിന്നു ഡൽഹിയിലേക്കു പോയ ഗോ ഫസ്റ്റിന്റെ ജി8–116 വിമാനമാണു ടിക്കെറ്റെടുത്ത 55 യാത്രക്കാരെ കയറ്റാതെ പറന്നത്. തൊട്ടടുത്ത ദിവസംതന്നെ ഡിജിസിഎ ഗോ ഫസ്റ്റിനോട് വിശദീകരണം ചോദിച്ചിരുന്നു.