24 മണിക്കൂറിനിടെ രോഗം സ്ഥിരീകരിച്ചത് 336 പേര്‍ക്ക്

ഇന്ത്യയില്‍ കൊറോണ വൈറസ് ബാധിച്ച്‌ 56 പേര്‍ മരിച്ചതായി കേന്ദ്ര ആരോഗ്യ മന്ത്രാലയം അറിയിച്ചു. കഴിഞ്ഞ 24 മണിക്കൂറിനിടെ മൂന്നുപേര്‍ മരിക്കുകയും പുതുതായി 336 പേര്‍ക്ക് വൈറസ് ബാധ സ്ഥിരീകരിക്കുകയും ചെയ്തതായി മന്ത്രാലയം അറിയിച്ചു. ഇതോടെ രാജ്യത്ത് കൊറോണ ബാധിതരുടെ എണ്ണം 2,301 ആയി. കൊറോണ ബാധിതരായ 157 പേര്‍ ചികിത്സയ്ക്ക് ശേഷം രോഗം ഭേദമായി ആശുപത്രി വിട്ടു.

ഹിമാചല്‍ പ്രദേശിലെ സോളന്‍ ജില്ലയില്‍ രോഗം ബാധിച്ച സ്ത്രീ മരിച്ചു. ഇതോടെ ഹിമാചലിലെ കോവിഡ് പോസിറ്റീവ് കേസുകളുടെ എണ്ണം ഏഴായി. രണ്ടുപേര്‍ മരിച്ചു. ആന്ധ്രാ പ്രദേശില്‍ രോഗികളുടെ എണ്ണം 161 ആയി ഉയര്‍ന്നു. ഇതില്‍ 140 പേരും ഡല്‍ഹിയില്‍ നടന്ന തബ്‌ലീഗ് സമ്മേളനത്തില്‍ പങ്കെടുത്തവരാണെന്ന് മുഖ്യമന്ത്രിയുടെ ഓഫിസ് അറിയിച്ചു. ഗോവയിലും ഒരാള്‍ക്ക് കൂടി രോഗം സ്ഥിരീകരിച്ചു. ഇതോടെ സംസ്ഥാനത്ത് കോവിഡ് ബാധിതരുടെ എണ്ണം ആറായി.

ഡല്‍ഹിയില്‍ യുഎസ് എംബസിയിലെ ജീവനക്കാരനും വൈറസ് ബാധ സ്ഥിരീകരിച്ചിട്ടുണ്ട്. ഇന്ത്യയില്‍ ഏറ്റവും കൂടുതല്‍ കോവിഡ് 19 രോഗികള്‍ ഉള്ളത് മഹാരാഷ്ട്രയിലാണ്. 335 പേര്‍ക്കാണ് ഇവിടെ രോഗബാധ സ്ഥിരീകരിച്ചിട്ടുള്ളത്. 16 പേരാണ് ഇവിടെ രോഗം ബാധിച്ച്‌ മരിച്ചത്. ഗുജറാത്ത് ഏഴ്, മധ്യപ്രദേശ് ആറ്, പഞ്ചാബ് നാല്, കര്‍ണാടക മൂന്ന്, തെലങ്കാന മൂന്ന്, പശ്ചിമബംഗാള്‍ മൂന്ന്, ഡല്‍ഹി നാല്, ജമ്മു കശ്മീര്‍ രണ്ട്, ഉത്തര്‍പ്രദേശ് രണ്ട്, കേരളം രണ്ട്, ആന്ധ്രാപ്രദേശ്, തമിഴ്‌നാട്, ബിഹാര്‍, ഹിമാചല്‍പ്രദേശ് എന്നിവിടങ്ങളില്‍ ഓരോരുത്തരുമാണ് മരിച്ചത്. തമിഴ്‌നാട്ടില്‍ 309 പേര്‍ക്കും കേരളത്തില്‍ 286 പേര്‍ക്കും ഡല്‍ഹിയില്‍ 219 പേര്‍ക്കും കൊറോണ സ്ഥിരീകരിച്ചിട്ടുണ്ട്.