പിടിച്ചു തള്ളി, പ്രശ്‌നങ്ങള്‍ക്ക് കാരണം ജയരാജന്‍ തന്നെ, ഇന്‍ഡിഗോ വിമാന കമ്പനിയുടെ അന്വേഷണ റിപ്പോര്‍ട്ട്

തിരുവനന്തപുരം: മുഖ്യമന്ത്രി യാത്ര ചെയ്തിരുന്ന ഇന്‍ഡിഗോ വിമാനത്തിനുള്ളില്‍ യുവാക്കളുടെ പ്രതിഷേധവും ഇപി ജയരാജന്‍ ഇവരെ പിടിച്ച് തള്ളിയതുമൊക്കെ വലിയ ചര്‍ച്ചയായിരിക്കുകയാണ്. എന്നാല്‍ പ്രശ്‌നം വഷളാകാന്‍ കാരണം ഇപി ജയരാജന്‍ ആണെന്ന വിവരമാണ് ഇപ്പോള്‍ പുറത്ത് വരുന്നത്. വിമാനക്കമ്പനി നടത്തിയ അന്വേഷണ റിപ്പോര്‍ട്ടിലും ഇത് വ്യക്തമാണ്. യുവാക്കളെ ഇപി ജയരാജന്‍ പിടിച്ചു തള്ളിയെന്ന് റിപ്പോര്‍ട്ടില്‍ വ്യക്തമാണ്.

പ്രതിഷേധിക്കുന്ന യുവാക്കളെ ശാന്തരാക്കാന്‍ ഇന്‍ഡിഗോ ക്യാബിന്‍ ക്രൂ ശ്രമിച്ചിരുന്നു. എന്നാല്‍ ഇതിനിടെയാണ് ഇവരെ ഇപി ജയരാജന്‍ പിടിച്ച് തള്ളിയത്. ഇന്‍ഡിഗോ ചൊവ്വാഴ്ച നടത്തിയ വിശദമായ ആഭ്യന്തരഅന്വേഷണത്തിലാണ് ഈ റിപ്പോര്‍ട്ട്. ഈ റിപ്പോര്‍ട്ട് ഇന്‍ഡിഗോ ഡിജിപിക്ക് കൈമാറി എന്നാണ് വിവരം.

മുദ്രാവാക്യം വിളിച്ചതല്ല, മുദ്രാവാക്യം വിളിച്ച യാത്രക്കാരെ അതിക്രൂരമായി വിമാനത്തിനുള്ളില്‍ തല്ലിച്ചതച്ചതാണ് ഗുരുതരമായ കുറ്റകൃത്യമെന്നാണ് പൈലറ്റിന്റെ നിലപാടെന്നും റിപ്പോര്‍ട്ടുണ്ട്. അതുകൊണ്ടാണ് മുദ്രാവാക്യം വിളിച്ചതിനെക്കുറിച്ച് പൈലറ്റ് എയര്‍ ട്രാഫിക് കണ്‍ട്രോളില്‍ അറിയിക്കാതിരുന്നത്. ഇതോടെ യുവാക്കള്‍ക്കെതിരെ മുഖ്യമന്ത്രിയെ വധിക്കാന്‍ ശ്രമിച്ചതിന് കേസെടുക്കാന്‍ തുനിഞ്ഞ പൊലീസ് പ്രതിരോധത്തിലായിരിക്കുകയാണ്. ഇപ്പോള്‍ മുഖ്യമന്ത്രിയുടെ ഗണ്‍മാന്‍ അനിലിന്റെയും പി.എ.ആയ സുനീഷിന്റെയും മൊഴി പ്രകാരമാണ് മുഖ്യമന്ത്രിയെ വധിക്കാന്‍ ശ്രമിച്ചുവെന്ന കേസെടുത്തിരിക്കുന്നത്.