സ്ത്രീകളുടെ ലൈംഗികാവയവങ്ങളെ ലക്ഷ്യമിട്ട് വെടി ഉതിർത്ത് ഇറാനിയൻ സൈന്യം

ടെഹ്റാൻ. ഇസ്ലാമിക രാജ്യമായ ഇറാനിൽ ഹിജാബ് വിരുദ്ധ പ്രതിഷേധം തുടരുന്നതിനിടെ, സ്ത്രീകളുടെ മുഖം, സ്തനങ്ങൾ, ജനനേന്ദ്രിയങ്ങൾ എന്നിവ ലക്‌ഷ്യം വെച്ച് സൈനികർ വെടി ഉതിർക്കുന്നതായി ഇറാനിലെ ഡോക്ടർമാരുടെ സംഘം.

ഹിജാബ് വിരുദ്ധ പ്രക്ഷോഭത്തിൽ പരിക്കേറ്റ നിരവധി പേരാണ് ഇറാനിൽ ചികിത്സയിൽ കഴിയുന്നത്. ഇവരെ ചികിത്സിക്കുന്ന ഡോക്ടർമാരും നഴ്‌സുമാരും അറസ്റ്റ് ഒഴിവാക്കാൻ രഹസ്യമായാണ് ചികിത്സ നടത്തി വരുന്നത്. സ്ത്രീകളുടെ ലൈംഗികാവയവങ്ങളെയാണ് ഇറാനിയൻ സൈന്യം ലക്ഷ്യമിടുന്നതെന്ന് ശ്രദ്ധയിൽപ്പെട്ടതായി പരിക്കേറ്റവരെ ചികിത്സിക്കുന്ന ഡോക്ടർമാർ പറഞ്ഞിരിക്കുന്നു.

ചികിത്സയ്‌ക്കെത്തുന്ന സ്ത്രീകളുടെ കാലുകളിലും നിതംബത്തിലും മുതുകിലും സ്തനങ്ങളിലും ജനനേന്ദ്രിയത്തിലും മുറിവുകൾ കാണപ്പെടുന്നതായിട്ടാണ് ഡോക്ടർമാർ പറഞ്ഞിരിക്കുന്നത്. ‘ഇറാൻ സൈനിക സുരക്ഷാ ഉദ്യോഗസ്ഥർ പുരുഷന്മാരെയും സ്ത്രീകളെയും വ്യത്യസ്ത രീതികളിൽ ലക്ഷ്യമിടുന്നു. സ്ത്രീകളുടെ സൗന്ദര്യം നശിപ്പിക്കാൻ അവർ ആഗ്രഹിക്കുന്നു.’ ഇറാനിലെ ഇസ്ഫഹാൻ പ്രവിശ്യയിൽ നിന്നുള്ള ഒരു ഡോക്ടർ പറയുന്നു.

ഏകദേശം 20 വയസ്സുള്ള ഒരു സ്ത്രീയെ താൻ ചികിത്സിച്ചതായും, രണ്ട് വെടിയുണ്ടകൾ ജനനേന്ദ്രിയത്തിലും പത്ത് വെടിയുണ്ടകൾ തുടയിലും പതിച്ചു. തുടയിൽ പതിച്ച വെടിയുണ്ടകൾ നീക്കം ചെയ്യാനായെങ്കിലും ജനനേന്ദ്രിയത്തിൽ പതിച്ച വെടിയുണ്ടകൾ മൂത്രനാളിക്ക് പോലും തകരാർ ഉണ്ടാക്കുന്ന വിധമാണ് പതിച്ചിരുന്നതെന്നും ഡോക്ടർ പറയുന്നു.

സ്ത്രീക്ക് അണുബാധ ഉണ്ടാകാനുള്ള സാധ്യതയുണ്ടായിരുന്നു. അതിനാൽ ഞാൻ വിശ്വസനീയമായ ഒരു ഗൈനക്കോളജിസ്റ്റിനെ കാണാൻ ആവശ്യപ്പെട്ടു – അദ്ദേഹം പറഞ്ഞു. ഇറാനിലെ മതമൗലികവാദ സർക്കാരിന്റെ ക്രൂരതയുടെ ചില ഫോട്ടോകളും പുറത്ത് വന്നിട്ടുണ്ട്. ഈ ഫോട്ടോകളിൽ, സ്ത്രീകളുടെ ശരീരത്തിൽ വെടിയേറ്റ പാടുകൾ വ്യക്തമായി കാണാവുന്നതാണ്.

ഇറാനിലെ മിക്കവാറും എല്ലാ നഗരങ്ങളിലും ഹിജാബ് നിയമത്തിനെതിരെ സ്ത്രീകൾ തെരുവിലിറങ്ങുന്ന സാഹചര്യമാണ് ഇപ്പോഴുള്ളത്. ഇറാനിലെ സ്ത്രീകൾ ഹിജാബ് ധരിക്കാനോ മുടി മറയ്‌ക്കാനോ തയ്യാറല്ല. തുടക്കത്തിൽ സ്ത്രീകൾ മാത്രമാണ് ഈ പ്രകടനത്തിൽ പങ്കെടുത്തിരുന്നത്. നിലവിൽ വലിയൊരു വിഭാഗം പുരുഷന്മാരും അതിൽ പങ്കെടുക്കുന്നു. അവസാന ശ്വാസം വരെ അവകാശങ്ങൾക്കുവേണ്ടി പോരാടുമെന്ന് സമരക്കാർ പറയുകയാണ്. ഇറാനിലെ 31 പ്രവിശ്യകളിലെയും 164 നഗരങ്ങളിലേക്ക് പ്രകടനങ്ങൾ വ്യാപിച്ചിച്ചിരിക്കുകയാണ്.