ഐഎസ് ബന്ധം; കണ്ണൂരിൽ അറസ്റ്റിലായ വനിതകളെക്കുറിച്ചു ഞെട്ടിക്കുന്ന വിവരങ്ങൾ പുറത്തുവിട്ട് എൻ.ഐ.എ

കണ്ണൂരിൽ അറസ്റ്റിലായ മിസ സിദ്ദിഖും ഷിഫ ഹാരിസും ഐഎസുമായി വളരെ അടുത്ത ബന്ധം പുലർത്തിയിരുന്നെന്നു എൻ.ഐ.എ. അറസ്റ്റിലായ രണ്ട് ഐഎസ് വനിതകളെക്കുറിച്ചും ഞെട്ടിക്കുന്ന വിവരങ്ങളാണ് പുറത്തു വരുന്നത്. കേരളത്തിൽ ഐഎസിന്റെ പ്രവർത്തനം ഏകോപിപ്പിച്ചിരുന്ന മൊഹമ്മദ് അമീന്റെ നിർദ്ദേശം അനുസരിച്ചാണ് ഇവർ പ്രവർത്തിച്ചിരുന്നത്. ഐഎസിനായി പുതിയ അംഗങ്ങളെ റിക്രൂട്ട് ചെയ്യാനും ഇവർ പ്രവർത്തിച്ചു.

ടെലിഗ്രാമിലും ഹൂപ്പിലും ഇൻസ്റ്റാഗ്രാമിലും ഐഎസ് ആശയങ്ങൾ പടർത്തുന്നതിൽ ഇവർ നിർണായക പങ്കു വഹിച്ചിട്ടുണ്ട്. മിസ സിദ്ദിഖ് മറ്റ് ഭീകരർക്കൊപ്പം ടെഹ്‌റാനിലേക്ക് പോയിരുന്നു. ഇതുവഴി സിറിയയിലെത്താനായിരുന്നു ശ്രമം. അടുത്ത ബന്ധുക്കളായ മുഷാബ് അൻവറിനേയും ഷിഫ ഹാരിസിനേയും ഐഎസ് ആശയത്തിലേക്ക് അടുപ്പിച്ചത് മിസ സിദ്ദിഖ് ആണ്. മുഹമ്മദ് വഖാർ ലോൺ എന്ന കശ്മീരി സ്വദേശിക്ക് ഭീകര പ്രവർത്തനത്തിനുള്ള ഫണ്ട് കൈമാറുന്നതിൽ ഷിഫ ഹാരിസ് പ്രധാന പങ്കു വഹിച്ചെന്ന് എൻ.ഐ.എ കണ്ടെത്തി. ഐഎസ് ഭരണത്തിന്റെ അധീനതയിലുള്ള സ്ഥലത്തെത്തി ഇസ്ലാമിക് സ്റ്റേറ്റ് ഭീകര സംഘടനയിൽ ചേരാൻ ഷിഫ ഹാരിസ് തീരുമാനിച്ചിരുന്നെന്നും എൻ.ഐ.എ വ്യക്തമാക്കി. കേസിൽ കൂടുതൽ അന്വേഷണം നടക്കുകയാണ്.

സിറിയയിലും ഇറാഖിലും ഐഎസ് തകർന്നടിഞ്ഞെങ്കിലും ലോകത്ത് വിവിധയിടങ്ങളിൽ ഐഎസ് സ്ലീപ്പർ സെല്ലുകൾ സജീവമാണ്. കേരളത്തിൽ നിന്ന് പോപ്പുലർ ഫ്രണ്ട് പ്രവർത്തകരുൾപ്പെടെ നിരവധി പേരാണ് ഐഎസിൽ ചേർന്നിട്ടുള്ളത്. ഇവരുമായി ബന്ധമുള്ളവർ സ്ലീപ്പർ സെല്ലുകളായി സംസ്ഥാനത്തിന്റെ വിവിധ ഭാഗങ്ങളിൽ ഉണ്ടെന്നാണ് രഹസ്യാന്വേഷണ റിപ്പോർട്ടുകൾ വ്യക്തമാക്കുന്നത്.