യുദ്ധം പുനരാരംഭിച്ചു, അഞ്ച് ഇസ്രായേലിബന്ദികൾ കൊല്ലപ്പെട്ടെന്ന് സ്ഥിരീകരണം, മൃതദേഹം കണ്ടെത്തി

ടെൽ അവീവ് : താത്കാലിക വെടിനിർത്തൽ ധാരണ അവസാനിച്ചതോടെ ഗാസയിൽ ഇസ്രായേൽ യുദ്ധം പുനരാരംഭിചു. എന്നാൽ ഇതോടെ ഗാസയിൽ ഹമാസ് ഭീകരർ ബന്ദികളാക്കിയ അഞ്ച് പേരുടെ മരണം സ്ഥിരീകരിച്ചതായുള്ള വിവരങ്ങളും പുറത്തു വരികയാണ്. ഒരാളുടെ മൃതദേഹം ഇസ്രായേലിലേക്ക് എത്തിച്ചതായും സൈനിക വക്താവ് ഡാനിയൽ ഹഗാരി പറഞ്ഞു.

എലിയാഹു മാർഗലിറ്റ്, മായ ഗോറെൻ, റോണൻ എൻഗൽ, ആര്യേ സൽമനോവിറ്റ്‌സ്, ഓഫിർ സർഫതി എന്നിവരാണ് കൊല്ലപ്പെട്ടത്. മരണവിവരം ഇവരുടെ കുടുംബാംഗങ്ങളെ അറിയിച്ചു. ഇതിൽ ഓഫിർ സർവതിയുടെ മൃതദേഹമാണ് ഇസ്രായേലിലേക്ക് എത്തിച്ചത്. 17 സ്ത്രീകളും കുട്ടികളും ഉൾപ്പടെ
136 പേർ ഇപ്പോഴും ഹമാസിന്റെ പിടിയിലുണ്ട്.

ഓഫിറിന്റെ മൃതദേഹം ഗാസയുടെ അതിർത്തി മേഖലയിൽ നിന്നാണ് കണ്ടെത്തിയതെന്ന് സൈന്യം പുറത്തിറക്കിയ പ്രസ്താവനയിൽ പറയുന്നു. തൊട്ടുപിന്നാലെ കുടുംബാംഗങ്ങളെ വിവരം അറിയിക്കുകയായിരുന്നു. ഗാസയിൽ ഇസ്രായേൽ യുദ്ധം പുനരാരംഭിച്ചിട്ടുണ്ട്. ഇസ്രായേലിന്റെ വിവിധ മേഖലകളിലേക്ക് ഹമാസ് ഭീകരർ വെടിയുതിർത്തുവെന്നും, ശക്തമായ പ്രത്യാക്രമണം നടത്തിയതായും ഇസ്രായേൽ പ്രതിരോധ സേന പ്രതികരിച്ചു.