വരുന്നത് കുഞ്ഞാലിക്കുട്ടിയാണ്…ലീഗില്‍ അസ്വാരസ്യം, തീരുമാനം മാറ്റിയേക്കും

കോഴിക്കോട് : മുസ്ലീം ലീഗ് നേതാവ് പി കെ കുഞ്ഞാലിക്കുട്ടി എംപി സ്ഥാനം രാജിവെച്ച്‌ വീണ്ടും സംസ്ഥാന രാഷ്ട്രീയത്തിലേക്ക് മടങ്ങാനുള്ള തീരുമാനത്തില്‍ ലീഗിനുള്ളില്‍ അസ്വാരസ്യം. യൂത്ത് ലീഗ് നേതാക്കളാണ് ഇക്കാര്യത്തില്‍ മുതിര്‍ന്ന നേതാക്കളോട് അതൃപ്തി അറിയിച്ചത്.

യുവാക്കള്‍ക്ക് അവസരം നല്‍കി സിപിഎം ഉള്‍പ്പെടെയുള്ള പാര്‍ട്ടികള്‍ ജനസമ്മിതി നേടിയെടുക്കവെ ഓരോ തെരഞ്ഞെടുപ്പിലും ഒരേ നേതാവ് തന്നെ മാറി മാറി സ്ഥാനാര്‍ഥിയാകുന്നത് പാര്‍ട്ടിക്ക് തിരിച്ചടി നല്‍കുമെന്ന് യൂത്ത് ലീഗ് ചൂണ്ടിക്കാട്ടുന്നു.പികെ കുഞ്ഞാലിക്കുട്ടിക്കെതിരെ കെ എം ഷാജി എംഎല്‍എ തന്നെ പരോക്ഷ വിമര്‍ശനവുമായെത്തിയത് ലീഗിനുള്ളിലെ അസ്വസ്ഥത വെളിവാക്കുന്നതാണ്. അധികാരത്തെ ഭ്രാന്തായി എടുക്കരുതെന്നും ജനങ്ങള്‍ അറിഞ്ഞുകൊണ്ട് തെരഞ്ഞെടുക്കുമ്ബോള്‍ ഉത്തരവാദിത്വം കാട്ടണമെന്നുമാണ് ഷാജി പരസ്യമായി ആവശ്യപ്പെട്ടത്.

തദ്ദേശ തെരഞ്ഞെടുപ്പിലെ തോല്‍വിയോടെ യുഡിഎഫ് നേതൃത്വത്തിലുണ്ടായ പരിഭ്രാന്തിയാണ് കുഞ്ഞാലിക്കുട്ടിയുടെ മടക്കത്തിന് പിന്നിലെ പ്രധാന കാരണം. പ്രതിപക്ഷ നേതാവ് രമേശ് ചെന്നത്തലയുടെ നേതൃത്വത്തിന് തെരഞ്ഞെടുപ്പിനെ നേരിടാനുള്ള കെല്‍പില്ലിന്നും കുഞ്ഞാലിക്കുട്ടിയെപ്പോലെ പരിചയ സമ്ബന്നനെ സജീവമാക്കിയാല്‍ മാത്രമേ യുഡിഎഫിന് സാധ്യതയുള്ളൂവെന്നുമാണ് ലീഗ് നേതൃത്വത്തിന്റെ വിലയിരുത്തല്‍.

യുഡിഎഫിന് അധികാരം കിട്ടുകയാണെങ്കില്‍ കുഞ്ഞാലിക്കുട്ടിയെ ഉപമുഖ്യമന്ത്രിയാക്കാമെന്ന കണക്കുകൂട്ടലും ലീഗിന്റെ തീരുമാനത്തിന് പിന്നിലുണ്ട്. എന്നാല്‍, യൂത്ത് ലീഗിന്റേയും മുതിര്‍ന്ന നേതാക്കളുടേയും എതിര്‍പ്പോടെ കുഞ്ഞാലിക്കുട്ടിയുടെ തിരിച്ചുവരവില്‍ ലീഗ് പുനരാലോചന നടത്തിയേക്കും.

അതേസമയം, കുഞ്ഞാലിക്കുട്ടി എംപി സ്ഥാനം രാജിവെച്ചാല്‍ ഇത് തെരഞ്ഞെടുപ്പ് ആയുധമാക്കാനാണ് ഇടതുപക്ഷത്തിന്റെ തീരുമാനം. സര്‍ക്കാര്‍ ഖജനാവിന് കോടികളുടെ ബാധ്യതയുണ്ടാക്കുന്നതാണ് ഇതെന്നും ജനങ്ങള്‍ കുഞ്ഞാലിക്കുട്ടിയെ ഏല്‍പ്പിച്ച ഉത്തരവാദിത്വം നിറവേറ്റിയില്ലെന്നും ഇടതുപക്ഷം ആരോപിക്കുന്നു.

ദേശീയ തലത്തില്‍ ബിജെപിക്കെതിരായ ശബ്ദമാകാനാണ് കുഞ്ഞാലിക്കുട്ടിയെ ലീഗ് ലോക്‌സഭയിലേക്ക് അയക്കുന്നത്. മോദിയെ താഴെയിറക്കാതെ വിശ്രമമില്ലെന്ന് പറഞ്ഞ് ഡല്‍ഹിക്ക് വിമാനം കയറിയ കുഞ്ഞാലിക്കുട്ടി ഒരു വര്‍ഷം കഴിയുമ്ബോഴേക്കും നിയമസഭയിലേക്ക് തിരിച്ചെത്തുമ്ബോള്‍ പരിഹസിക്കപ്പെടുന്നത് വോട്ടു ചെയ്ത ജനങ്ങള്‍ കൂടിയാണ്.