ഒഡീഷ ട്രെയിന്‍ അപകടം, പോയിന്റ് മെഷീനില്‍ ഉണ്ടായ തകരാറാകാം അപകടകാരണമെന്ന് നിഗമനം

ബാലസോര്‍. ട്രെയിന്‍ അപകടത്തിന് കാരണം പോയിന്റ് മെഷീനില്‍ ഉണ്ടായ തകരാറാകാമെന്ന് വിവരം. സിഗ്നല്‍ എന്‍ജിനീയറാണ് ഇത് സംബന്ധിച്ച കാര്യം പറഞ്ഞത്. ടേണ്‍ ഔട്ടുകള്‍ ക്രമീകരിക്കുന്ന പോയിന്റ് മെഷിന്റെ വയറിങ്ങില്‍ ഉണ്ടായ തകരാര്‍ അപകടത്തിന് കാരണമായിരിക്കാം എന്നാണ് സിഗ്നല്‍ എന്‍ജിനീയര്‍ പറയുന്നത്. ലൂപ്പ് ട്രാക്കിലേക്ക് ആദ്യം എത്തിയത് ചരക്ക് ട്രെയിനാണ്.

രണ്ടാമതായി എത്തിയ കോറമാണ്ഡല്‍ എക്‌സ്പ്രസ് ലൂപ്പ് ട്രാക്കില്‍ പ്രവേശിക്കുന്നതിന് പകരം ലൂപ്പ് ട്രാക്കിലേക്ക് കടക്കുകയായിരുന്നു. ഇടിയുടെ ആഘാതത്തില്‍ തെന്നിമാറിയ ട്രെയിന്‍ ബോഗികള്‍ സമാന്തര പാളത്തിലൂടെ എത്തിയ ട്രെയിനില്‍ ഇടിക്കുകയായിരുന്നു. ട്രാക്ക് സ്വിച്ച് ചെയ്തപ്പോഴുണ്ടായ അപകടമാണ് കാരണമെന്ന് റെയില്‍വേയില്‍ നിന്നും വിരമിച്ച എന്‍ജിനീയര്‍ പറയുന്നു.

പോയിന്റ് മെഷീന്റെ അറ്റകുറ്റപ്പണി നടത്തുമ്പോള്‍ വയറിങ്ങില്‍ പിഴവ് വരാന്‍ സാധ്യതയുണ്ട്. അതേസമയം അപകടകാരണം അടക്കം പഠിക്കാനുള്ള തയ്യാറെടുപ്പിലാണ് റെയില്‍വേ. ഒഡീഷയിൽ ട്രെയിനുകൾ കൂട്ടിയിടിച്ച് അപകടം ഉണ്ടായ ദുരന്ത ഭൂമിയിൽ കണ്ണീരൊപ്പാൻ പ്രധാനമന്ത്രി നരേന്ദ്രമോദി. വ്യോമസേനയുടെ ഹെലികോപ്റ്ററിലാണ് പ്രധാനമന്ത്രി ബാലസോറില്‍ എത്തുന്നത്. മോദിക്കൊപ്പം കേന്ദ്രമന്ത്രിമാരായ അശ്വനി വൈഷ്ണവ്, ധര്‍മ്മേന്ദ്ര പ്രദാന്‍ എന്നിവരും എത്തിയിട്ടുണ്ട്.

ഉന്നത ഉദ്യോഗസ്ഥരുമായി ആശയവിനിമയം നടത്തിയ മോദി പരിക്കേറ്റ് ചികിത്സയില്‍ കഴിയുന്നവര്‍ക്ക് എല്ലാ സഹായങ്ങളും ലഭ്യമാക്കണമെന്ന് നിര്‍ദേശിച്ചു. അപകടസ്ഥലത്ത് രക്ഷാപ്രവര്‍ത്തനം നടത്തുന്ന ദുരന്ത നിവാരണ സേനാംഗങ്ങളുമായും അദ്ദേഹം സംസാരിക്കുകയുണ്ടായി. തീവണ്ടി ഗതാഗതം പുനഃസ്ഥാപിക്കാനുള്ള ശ്രമങ്ങളെപ്പറ്റി ചോദിച്ച് മനസിലാക്കി. അപകടത്തില്‍ പരിക്കേറ്റ് ചികിത്സയില്‍ കഴിയുന്നവരെ സന്ദർക്കുകയാണ് പ്രധാന മന്ത്രി.