ജൂനിയർ മാണിയെ രക്ഷിക്കാൻ പോലീസ് ശ്രമം നടത്തിയിരുന്നു , വ്യാജമൊഴി രേഖപ്പെടുത്തി ഡ്രൈവറെ മാറ്റാൻ ശ്രമിച്ചു, തെളിവുകൾ പുറത്ത്

കോട്ടയം: രണ്ട് സഹോദരങ്ങളുടെ ജീവൻ നഷ്ടമാകാൻ ഇടയാക്കിയ ജോസ് കെ.മാണി എം.പിയുടെ മകൻ കെ.എം.മാണി പ്രതിയായ വാഹനാപകടത്തിൽ ജൂനിയർ മാണിയെ രക്ഷിക്കാൻ പോലീസ് ശ്രമങ്ങൾ നടത്തിയതിന്റെ കൂടുതൽ തെളിവുകൾ പുറത്ത്. പ്രതിയെ രക്ഷിക്കുന്നതിനായി എഫ്ഐആർൽ 45 വയസുള്ളയാളാണ് വാഹനം ഓടിച്ചിരുന്നതെന്നാണ് പോലീസ് രേഖപ്പെടുത്തിയത്. മരിച്ച സഹോദരങ്ങളുടെ പിതാവ് യോഹന്നാന്റെ ജ്യേഷ്ഠൻ ജോസ് മാത്യുവിന്റെ മൊഴിപ്രകാരമാണ് എഫ്.ഐ.ആറിൽ ഇങ്ങനെ എഴുതിയതെന്നായിരുന്നു പോലീസിന്റെ വാദം.

ഈ കള്ളക്കളിയാണ് ഇപ്പോൾ പൊളിഞ്ഞത്. അപകട വിവരമറിഞ്ഞ് എല്ലാവരും ആശുപത്രിയിലേക്കു പോയപ്പോൾ വീട്ടിലുണ്ടായിരുന്ന ജോസിനെ രണ്ട് പൊലീസുകാർ സ്റ്റേഷനിലേക്കു കൊണ്ടുപോയി അനുകൂല മൊഴി സൃഷ്ടിക്കുകയായിരുന്നു. ”വാഹനമോടിച്ചത് 45കാരനെന്ന് പറഞ്ഞിട്ടില്ല. അപകടത്തെപ്പറ്റി അറിയില്ലെന്നും ആ സമയം വീട്ടിലായിരുന്നെന്നുമാണ് മൊഴി നൽകിയത്. ഒരു കണ്ണിന് പൂർണമായും കാഴ്ചയില്ലാത്തതിനാൽ പൊലീസ് പറഞ്ഞിടത്ത് ഒപ്പിട്ട് നൽകുകയായിരുന്നു എന്ന് മരിച്ച സഹോദരങ്ങളുടെ പിതാവ് പറഞ്ഞു.

നീതി കിട്ടിയില്ലെങ്കിൽ മുഖ്യമന്ത്രിയെ സമീപിക്കുമെന്ന് മരിച്ച മണിമല കറിക്കാട്ടൂർ കുന്നുംപുറത്ത് താഴെ ജിസിന്റെയും ജിൻസിന്റെയും മാതാപിതാക്കളായ യോഹന്നാനും സിസമ്മയും വ്യക്തമാക്കി. അതേസമയം കേസുമായി മുന്നോട്ടു പോകാനാണ് മാതാപിതാക്കളുടെ തീരുമാനം. ജിസിന്റെ ഗർഭിണിയായ ഭാര്യ അൻസുവിന് മുന്നോട്ടുള്ള ജീവിതത്തിന് ജോലി നൽകണമെന്നാണ് കുടുംബത്തിന്റെ ആവശ്യം.