മുഖം ക്യാമറക്ക് മുന്നില്‍ കാണിക്കാതെ ആദ്യ ചിത്രം, തുറന്ന് പറഞ്ഞ് കലാഭവന്‍ ഷാജോണ്‍

മലയാളികളുടെ പ്രിയപ്പെട്ട നടനാണ് കലാഭന്‍ ഷാജോണ്‍. അടുത്തിടെ സംവിധാന രംഗത്തും അദ്ദേഹം തുടക്കം കുറിച്ചിരുന്നു. 2013ല്‍ പുറത്തെത്തിയ ദൃശ്യം എന്ന ചിത്രത്തിലെ നെഗറ്റീവ് ഷേഡുള്ള കോണ്‍സ്റ്റബിള്‍ സഹദേവന്‍ എന്ന കഥാപാത്രമാണ് ഷാജോണിന്റെ കരിയര്‍ മാറ്റി മറിച്ചത്. പിന്നീട് താരത്തിന് കൈ നിറയെ അവസരങ്ങളായിരുന്നു. ചെറുതും വലുതുമായ നിരവധി വേഷങ്ങള്‍ അഭിനയിച്ചു. അതിനിടെ 2019ല്‍ ബ്രദേഴ്‌സ് ഡേ എന്ന ചിത്രം പൃഥ്വിരാജിനെ നായകനാക്കി ഷാജോണ്‍ സംവിധാനം ചെയ്യുകയും ചെയ്തു. ഇപ്പരോള്‍ തന്റെ അരങ്ങേറ്റ ചിത്രത്തെ കുറിച്ച് തുറന്ന് പറഞ്ഞ് രംഗത്ത് എത്തിയിരിക്കുകയാണ് നടന്‍.

കലാഭവന്‍ മണി നായകനായ മൈഡിയര്‍ കരടി ആയിരുന്നു കലാഭവന്‍ ഷാജോണിന്റെ ആദ്യ ചിത്രം. സിനിമയില്‍ അഭിനയിക്കാന്‍ അവസരം വാങ്ങി തന്നത് കോട്ടയം നസീര്‍ ആയിരുന്നു. നിനക്ക് ഒരു വേഷമുണ്ട്. പക്ഷേ മുഖം പുറത്തുകാണിക്കില്ല, പൂര്‍ണമായും മാസ്‌ക്കിനുളളില്‍ ആയിരിക്കും. അതും കരടിയുടെ മാസ്‌ക്ക്. പക്ഷേ നിനക്ക് പെര്‍ഫോം ചെയ്യാനുളള സ്‌പേസ് ഉണ്ട്. ഇതായിരുന്നു മൈഡിയര്‍ കരടി എന്ന ചിത്രത്തിലെ കഥാപാത്രത്തെ കുറിച്ച് കോട്ടയം നസീര്‍ ഇക്ക തന്നോട് പറഞ്ഞത്. ഷാജോണ്‍ പറഞ്ഞു. മാസ്‌ക്കിനുളളില്‍ ആണ് അഭിനയമെങ്കിലും ഒരു ആര്‍ട്ടിസ്റ്റ് എന്ന നിലയില്‍ ആ കഥാപാത്രം ചെയ്യണമെന്ന് തോന്നി. അങ്ങനെ മുഖം കാണിക്കാതെ ഞാന്‍ എന്റെ ആദ്യത്തെ സിനിമ ചെയ്തു, കലാഭവന്‍ ഷാജോണ്‍ പറഞ്ഞു.

അതേസമയം കഴിഞ്ഞ വര്‍ഷം പുറത്തിറങ്ങിയ ഷൈലോക്കാണ് ഷാജോണിന്‌റെതായി ഒടുവില്‍ തിയ്യേറ്ററുകളില്‍ എത്തിയ ചിത്രം. മെഗാസ്റ്റാര്‍ മമ്മൂട്ടി നായകനായ മാസ് ചിത്രത്തില്‍ പ്രതിനായക വേഷത്തിലാണ് ഷാജോണ്‍ എത്തിയത്.