പുരുഷൻമാരെ മർദ്ദിക്കുമെന്ന് പ്രചാരണം വന്നതിനാ‍ൽ കല്യാണം പോലും നടക്കുന്നില്ല- കങ്കണ

ബോളിവുഡിന്റെ പ്രിയതാരമാണ് കങ്കണ. പലപ്പോഴും വിമർശനങ്ങളും കങ്കണയെ തേടി എത്തിയിട്ടുണ്ട്. സമൂഹത്തിൽ നടക്കുന്ന കാര്യങ്ങളോട് മുഖം നോക്കാതെ തന്റെ നിലപാട് അവതരിപ്പിക്കുന്ന ചുരുക്കം ചിലരിൽ ഒരാളുകൂടിയാണ് കങ്കണ. താനൊരു വഴക്കാളിയാണെന്ന് ആളുകൾ പറയുന്നുവെന്ന് പറയുകയാണ് നടി. ഇക്കാരണം കൊണ്ട് വിവാഹം കഴിക്കാനാകുമെന്ന് തോന്നുന്നില്ലെന്നും തമാശരൂപേണ കങ്കണ പറയുന്നു.

ധക്കഡ് എന്ന പുതിയ സിനിമയുടെ പ്രൊമോഷനുമായി ബന്ധപ്പെട്ട് കങ്കണ നൽകിയ അഭിമുഖത്തിൽ പറഞ്ഞ കാര്യങ്ങളാണ് ഇപ്പോൾ ശ്രദ്ധ നേടുന്നത്. താൻ പുരുഷന്മാരെ മർദ്ദിക്കുന്ന സ്വഭാവമുള്ളയാളാണെന്ന് പരക്കെ ഗോസിപ്പുകൾ പ്രചരിക്കുന്നുണ്ടെന്നും അതിനാൽ വിവാഹം കഴിക്കാൻ അനുയോജ്യനായ ആളെ കിട്ടുന്നില്ലെന്നുമാണ് കങ്കണ പറഞ്ഞത്. അടുത്തിടെ നൽകിയ മറ്റൊരു അഭിമുഖത്തിൽ താൻ വിവാഹം കഴിച്ച് കുടുംബമായി ജീവിക്കാൻ ആഗ്രഹിക്കുന്നെന്ന് കങ്കണ പറഞ്ഞിരുന്നു.

അടുത്ത അഞ്ച് വർഷത്തിനുള്ളിൽ താൻ ഭാര്യയും അമ്മയുമാവാനാഗ്രഹിക്കുന്നെന്നായിരുന്നു നടി പറഞ്ഞത്. താനൊരാളുമായി പ്രണയത്തിലാണെന്നും ഉടൻ തന്നെ കൂടുതൽ വിവരങ്ങൾ പുറത്തു വിടുമെന്നും നടി പറഞ്ഞു. ടൈംസ് നൗവിന് നൽകിയ അഭിമുഖത്തിലാണ് നടിയുടെ പ്രതികരണം.