11 വയസ്സുകാരന്റെ മരണം ഞെട്ടിക്കുന്നത്, എബിസി കേന്ദ്രങ്ങൾ തുടങ്ങാനാകാത്തത് പ്രാദേശിക എതിർപ്പ് കാരണമെന്ന് മന്ത്രി എംബി രാജേഷ്

കണ്ണൂർ: സംസാരശേഷിയില്ലാത്ത 11 വയസ്സുകാരനെ തെരുവുനായ കടിച്ചുകൊന്ന സംഭവം ദാരുണമെന്ന് മന്ത്രി എംബി രാജേഷ്. കുഞ്ഞിനെ കടിച്ചു കൊന്ന സംഭവം ഞെട്ടിപ്പിക്കുന്നതെന്ന് മന്ത്രി പ്രതികരിച്ചു. എബിസി കേന്ദ്രങ്ങൾ തുടങ്ങാനാകാതെ പോയത് പ്രാദേശിക എതിർപ്പ് കാരണമെന്നും മന്ത്രി പറഞ്ഞു. കണ്ണൂർ മുഴുപ്പിലങ്ങാട് കെട്ടിനകത്തെ നിഹാൽ നിഷാദാണ് മരിച്ചത്. ഞായറാഴ്ച വൈകിട്ട് അഞ്ചുമണിയോടെ കുട്ടിയെ കാണാതായിരുന്നു. മാനസിക ശാരീരിക വെല്ലുവിളി നേരിടുന്ന കുട്ടിയാണു നിഹാൽ. സംസാരശേഷിയും ഇല്ലായിരുന്നു.

വൈകീട്ട് കളിക്കുന്നതിനെടെ അഞ്ച് മണിയോടെ കുട്ടിയെ കാണാതായിരുന്നു.തുടർന്ന് നാട്ടുക്കാർ നടത്തിയ തിരച്ചിലിലാണ് മൃതദേഹേം കണ്ടെത്തിയത്. ബോധരഹിതനായ അവസ്ഥയിൽ കുട്ടിയെ നാട്ടുകാരാണ് ഒഴിഞ്ഞ പറമ്പിൽനിന്നും കണ്ടെത്തിയത്. തെരുവുനായ്ക്കളുടെ ആക്രമണത്തിൽ കുട്ടിയ്ക്ക് ബോധം നഷ്ടമാകുകയായിരുന്നു. കാണാതായ കുട്ടിയെ വീട്ടിൽ നിന്നും അരക്കിലോമീറ്റർ അകലെ നിന്നുമാണ് കണ്ടെത്തിയത്.

കുട്ടിയുടെ മുഖത്തും കൈകാലുകളും കടിച്ചു പറിച്ച പാടുകളുണ്ട്. മുഖത്ത് ആഴത്തിലുള്ള പാടുകളുണ്ട്. പ്രദേശത്ത് തെരുവുനായുടെ ശല്യമുണ്ടായിരുന്നു എന്ന് നാട്ടുകാർ പറയുന്നുണ്ട്. സംസാര ശേഷിയില്ലാത്ത കുട്ടിയായതിനാൽ നിലവിളിക്കാനും സാധിച്ചിട്ടുണ്ടാകില്ല എന്നും നാട്ടുകാർ പറയുന്നു. ചെടികൾക്കിടയിൽ ചോരയിൽ കുളിച്ചായിരുന്നു മൃതദേഹം. ധർമ്മടം സ്വാമിക്കുന്ന് ജേഴ്സീസ് സ്​പെഷ്യൽ സ്കൂൾ വിദ്യാർഥിയാണ്.എടക്കാട് പൊലീസ് സ്ഥലത്തെത്തി മൃതദേഹം പോസ്റ്റ്മോർട്ടത്തിനായ് തലശ്ശേരി ജനറൽ ആശുപത്രിയിലേക്ക് മാറ്റി.