കർണ്ണാടക തിരഞ്ഞെടുപ്പ് പുരോഗമിക്കുന്നു, വോട്ട് രേഖപ്പെടുത്തി ബിജെപി നേതാക്കൾ

ബെംഗളൂരു: കർണ്ണാടകയിൽ 224 നിയമസഭ മണ്ഡലങ്ങളിലേക്കുള്ള വോട്ടെടുപ്പ് പുരോഗമിക്കുന്നു. 5കോടി 30 ലക്ഷം വോട്ടർമാർ ഇന്ന് പോളിംഗ് ബൂത്തിലെത്തും. കേന്ദ്രമന്ത്രി നിർമ്മലാ സീതാരാമൻ, കർണ്ണാടക മുഖ്യമന്ത്രി ബസവരാജ് ബൊമ്മൈ, കർണ്ണാടക മുൻ മുഖ്യമന്ത്രിയും മുതിർന്ന ബിജെപി നേതാവുമായ ബിഎസ് യെദ്യൂരപ്പ തുടങ്ങിയവർ വോട്ട് രേഖപ്പെടുത്തി.

വോട്ടെടുപ്പ് നടക്കുന്ന പശ്ചാത്തലത്തിൽ കർണ്ണാടകയിൽ സുരക്ഷയ്‌ക്കായി 88000 പോലീസുകാരെയാണ് വിന്യസിച്ചിരിക്കുന്നത്. മഹാരാഷ്‌ട്രയും ഗോവയുമായുള്ള അതിർത്തികളിൽ കനത്ത സുരക്ഷ ഏർപ്പെടുത്തി.
ഏറെ പ്രതീക്ഷയോടെയാണ് തിരഞ്ഞെടുപ്പിനെ വിവിധ രാഷ്‌ട്രീയ പാർട്ടികൾ നോക്കി കാണുന്നത്. സംസ്ഥാനത്തെ 58,282 പോളിംഗ് ബൂത്തുകളിലാണ് തിരഞ്ഞെടുപ്പ് നടക്കുന്നത്. 224 നിയമസഭ മണ്ഡലങ്ങളിലേക്കുള്ള തെരഞ്ഞെടുപ്പ് ഒറ്റഘട്ടമായിട്ടാണ് നടക്കുക.

ഭിന്നശേഷിക്കാർക്കും 80 വയസ്സിന് മുകളിൽ പ്രായമുള്ളവർക്കും ഇത്തവണ വീട്ടിലിരുന്ന് വോട്ട് ചെയ്യാം. 5.21 കോടി വോട്ടർമാരാണ് കർണ്ണാടകയിലുള്ളത്. 9.17 ലക്ഷം പുതിയ വോട്ടർമാരും 4,699 ട്രാൻസ് ജെൻഡർ വോട്ടർമാരും ഇത്തവണ ബൂത്തിലെത്തും. രാവിലെ ഏഴ് മുതൽ ആരംഭിച്ച പോളിംഗ് വൈകുന്നേരം ആറ് മണി വരെ നീളും.