കരുവന്നൂരിൽ നിക്ഷേപകർക്ക് ആശ്വാസം, പുനരുദ്ധാരണ പാക്കേജ്, നവംബർ ഒന്ന് മുതൽ പണം പിന്‍വലിക്കാം

കരുവന്നൂര്‍ : സംസ്ഥാനം കണ്ട ഏറ്റവും വലിയ സഹകരണ ബാങ്ക് തട്ടിപ്പ് നടന്ന കരുവന്നൂര്‍ ബാങ്കിനെ പൂര്‍വസ്ഥിതിയിലാക്കാനും നിക്ഷേപകരുടെ പണം തിരിച്ചുനല്‍കുന്നത് ഉറപ്പുവരുത്താനും വേണ്ടി അഡ്മിനിസ്ട്രേറ്റീവ് കമ്മിറ്റി പുനരുദ്ധാരണ പാക്കേജ് പ്രഖ്യാപിച്ചു. നിക്ഷേപകർക്ക് വളരെ ആശ്വാസം പകരുന്ന നടപടിയാണ് ഉണ്ടായിരിക്കുന്നത്. നവംബര്‍ ഒന്നു മുതല്‍ 50,000 രൂപയ്ക്കുമേല്‍ ഒരു ലക്ഷം രൂപ വരെ കാലാവധി പൂര്‍ത്തീകരിച്ച നിക്ഷേപകര്‍ക്ക് ആവശ്യാനുസരണം നിക്ഷേപം പൂര്‍ണമായി പിന്‍വലിക്കാനും പുതുക്കാനും സാധിക്കും.

11 മുതല്‍ 50,000 രൂപ വരെ കാലാവധി പൂര്‍ത്തീകരിച്ച സ്ഥിരനിക്ഷേപകര്‍ക്ക് ആവശ്യാനുസരണം പൂര്‍ണമായും തുക പിന്‍വലിക്കാനും പുതുക്കാനും അനുവദിക്കും. ഇതിനായി വരി നില്‍ക്കേണ്ടതില്ല. ബാങ്കിന്റെ എല്ലാ ശാഖകളില്‍നിന്നും പണം പിൻവലിക്കാനാകും. ആകെയുള്ള 23,688 സേവിങ്‌സ് ബാങ്ക് നിക്ഷേപകരില്‍ 21,190 പേര്‍ക്ക് പൂര്‍ണമായും തുക പിന്‍വലിക്കാനും ബാക്കിയുള്ള 2,448 പേര്‍ക്ക് ഭാഗികമായി തുക പിന്‍വലിക്കാനുമുള്ള അവസരമാണ് ലഭിക്കുന്നത്.

20-നു ശേഷം ബാങ്കിന്റെ എല്ലാ ശാഖകളിലുമുള്ള സേവിങ്‌സ് ബാങ്ക് നിക്ഷേപകര്‍ക്ക് അവരുടെ അക്കൗണ്ടുകളില്‍നിന്ന് 50,000 രൂപ വരെ പിന്‍വലിക്കാം. ഡിസംബര്‍ ഒന്നു മുതല്‍ ഒരു ലക്ഷം രൂപയ്ക്കു മുകളില്‍ നിക്ഷേപമുള്ള കാലാവധി പൂര്‍ത്തീകരിച്ച നിക്ഷേപങ്ങള്‍ക്ക് നിക്ഷേപത്തുകയുടെ നിശ്ചിത ശതമാനവും പലിശയും അനുവദിക്കും. പലിശ കൈപ്പറ്റി നിക്ഷേപം പുതുക്കാനും അനുമതി നല്‍കും.

ആകെയുള്ള 8,049 സ്ഥിര നിക്ഷേപകരില്‍ 3,770 പേര്‍ക്ക് നിക്ഷേപവും പലിശയും പൂര്‍ണമായും പിന്‍വലിക്കാനും ബാക്കി വരുന്ന കാലാവധി പൂര്‍ത്തീകരിച്ച നിക്ഷേപകര്‍ക്ക് ഭാഗികമായി നിക്ഷേപവും പലിശയും നൽകാനാകും.