കാവേരി നദിയിൽ ആവശ്യത്തിന് ജലമില്ല , തമിഴ്‌നാടിന് ജലം നൽകാൻ സാധിക്കില്ലെന്ന് കർണാടക ഉപമുഖ്യമന്ത്രി

ബെംഗളുരു: കാവേരി നദിയിൽ ആവശ്യത്തിന് ജലമില്ലെന്നും കാവേരി വാട്ടർ മാനേജ്‌മെന്റ് അതോറിറ്റിയുടെ നിർദ്ദേശം പാലിച്ച് തമിഴ്‌നാടിന് ജലം നൽകാൻ സാധിക്കില്ലെന്നും കർണാടക ഉപമുഖ്യമന്ത്രി ഡി.കെ. ശിവകുമാർ. ആവശ്യത്തിന് ജലം തമിഴ്‌നാടിന് വിട്ടുനൽകണമെന്ന് സിഡബ്ല്യൂആർസി കഴിഞ്ഞ ദിവസം അറിയിച്ചതിന് പിന്നാലെയാണ് കർണാടക നിലപാട് വ്യക്തമാക്കിയിരിക്കുന്നത്.

പ്രതിദിനം 2,600 ക്യൂസെക്‌സ് തോതിൽ വെള്ളം നവംബർ ഒന്നുമുതൽ 15 ദിവസത്തേക്ക് കാവേരിയിൽ നിന്ന് തമിഴ്‌നാടിന് നൽകാൻ സി.ഡബ്ല്യു.ആർ.സി കർണാടകയോട് തിങ്കളാഴ്ച നിർദേശിച്ചിരുന്നു.ഇത്തരത്തിൽ തുടർച്ചയായി 15 ദിവസം കർണാടക തമിഴ്‌നാട്ടിലേക്ക് ജലം വിട്ടുനൽകണമെന്നും അറിയിച്ചു.

ഇതിന് പിന്നാലെയാണ് ജലം വിട്ടുനൽകാൻ സാധിക്കില്ലെന്ന് കർണാടക അറിയിച്ചിരിക്കുന്നത്. കാവേരി നദീതടത്തിൽ ഏകദേശം 51 ടി.എം.സി. വെള്ളം മാത്രമേ ഇപ്പോഴുള്ളൂ. ഇത് കുടിവെള്ള പദ്ധതികൾക്ക് ആവശ്യമാണ്. തങ്ങൾക്ക് മുന്നിൽ മറ്റ് വഴികളില്ല. അണക്കെട്ടിലേക്ക് നീരൊഴുക്ക് വർധിപ്പിക്കാൻ വലിയ തോതിൽ മഴ പെയ്യണമെന്ന് നമുക്കെല്ലാവർക്കും ദൈവത്തോട് പ്രാർത്ഥിക്കാമെന്നും അദ്ദേഹം പറഞ്ഞു.

നിലവിലത്തെ സാഹചര്യത്തിൽ 2600 ക്യുസെക്‌സ് ജലം വിട്ടുനൽകാനുള്ള ശേഷിയില്ലെന്നും കൃഷ്ണ സാഗർ അണക്കെട്ടിലേക്ക് നീരൊഴുക്ക് കുറഞ്ഞിരിക്കുകയാണെന്നും ഡികെ ശിവകുമാർ പറഞ്ഞു. നിലവിൽ 815 ക്യുസെക്‌സ് ജലം സ്വാഭാവികമായി ഒഴുകുന്നുണ്ട്. കുടിവെള്ള പദ്ധതികൾക്കായുള്ള ജലം മാത്രമേ നിലവിൽ അണക്കെട്ടിൽ സംഭരിച്ചിട്ടുള്ളുവെന്നും ശിവകുമാർ കൂട്ടിച്ചേർത്തു.