കേരളം ഇന്ന് പോളിംഗ് ബൂത്തിലേക്ക്; വോട്ടെടുപ്പ് രാവിലെ ഏഴ് മണി മുതൽ വൈകീട്ട് ഏഴ് വരെ

അടുത്ത അഞ്ചു വർഷം കേരളം ആര് ഭരിക്കണമെന്നു ഇന്ന് ജനം വിധിയെഴുതും. കൊവിഡ് സാഹചര്യം നിലനിൽക്കുന്നുണ്ടെങ്കിലും അതിലും ശക്തമാണ് ജനാധിപത്യത്തിന്റെ വാഴ്ച എന്നോർമ്മിപ്പിക്കും വിധമായിരുന്നു ഇപ്രാവശ്യത്തെ പ്രചാരണം. 140 നിയമസഭാ നിയോജക മണ്ഡലങ്ങളിലായി 2,74,46,039 വോട്ടർമാരാണ് ഇത്തവണ ജനവിധിയെഴുതുന്നത്. 40,771 പോളിംഗ് സ്റ്റേഷനുകളാണ് തയ്യാറാക്കിയിട്ടുള്ളത്. കൊവിഡ് സാഹചര്യം കണക്കിലെടുത്ത് ഒരു ബൂത്തിൽ പരമാവധി 1000 വോട്ടർമാരെ മാത്രമാണ് അനുവദിക്കു. ആകെ 957 സ്ഥാനാർത്ഥികളാണ് മത്സരിക്കുന്നത്.

ഒന്നിലധികം വോട്ടു ചെയ്യുന്നതും ആൾമാറാട്ടം ചെയ്യുന്നതും തടയാൻ നടപടികളെടുത്തിട്ടുണ്ട്. ഇന്ന് രാവിലെ ഏഴ് മണി മുതൽ വൈകീട്ട് ഏഴ് വരെയാണ് വോട്ടെടുപ്പ്. അവസാന ഒരു മണിക്കൂറിൽ കൊവിഡ് രോഗികൾക്കും പ്രാഥമിക സമ്പർക്കപട്ടികയിൽ ഉള്ളവർക്കും വോട്ട് രേഖപ്പെടുത്താൻ അവസരം ഒരുക്കിയിട്ടുണ്ട്. സമാധാനപരമായി വോട്ട് ചെയ്യാൻ കേന്ദ്രസേന അടക്കമുള്ള സുരക്ഷ ക്രമീകരണങ്ങൾ നടത്തിയിട്ടുണ്ട്. മെയ് രണ്ടിനാണ് വോട്ടെണ്ണൽ.