സമൃദ്ധിയുടെ സന്ദേശവുമായി ഇന്ന് തിരുവോണം; എല്ലാ വായനക്കാര്‍ക്കും ഓണാശംസകള്‍

ഇന്ന് തിരുവോണം. സമൃദ്ധിയുടേയും ഒരുമയുടേയും സന്ദേശവുമായി ഒരിക്കല്‍ക്കൂടി ഓണമെത്തുമ്പോള്‍ ഒരുപാടൊന്നും സന്തോഷിക്കാന്‍ കഴിയാത്ത സാഹചര്യത്തിലാണ് മലയാളികള്‍. കോവിഡ് വ്യാപനത്തിന്റെ പശ്ചാത്തലത്തിലാണ് ഇത്തവണയും ഓണം എന്നത് സന്തോഷത്തിന്റെ മാറ്റ് കുറയ്ക്കുന്നുണ്ട്. ഓണം സോപ്പിട്ട് മാസ്‌കിട്ട് ഗ്യാപ്പിട്ട് എന്നതായിരുന്നു കഴിഞ്ഞ തവണത്തെ ആരോഗ്യ വകുപ്പിന്റെ സന്ദേശം. ഇത്തവണയും അതങ്ങനെ തന്നെ ആഘോഷിക്കേണ്ടി വന്നതില്‍ നമ്മുടെ ശ്രദ്ധയില്ലായ്മ ഒരു കാരണമായിട്ടുണ്ടോ എന്നതിനെക്കുറിച്ച് ചിന്തിക്കേണ്ടിയിരിക്കുന്നു.

ആഘോഷങ്ങള്‍ക്ക് മാറ്റ് കുറയുമെങ്കിലും ഓണത്തിന്റെ നിറമുള്ള ഓര്‍മ്മകള്‍ക്കോ, സന്ദേശങ്ങള്‍ക്കോ, സന്തോഷങ്ങള്‍ക്കോ മാറ്റ് കുറയില്ല. തിരുവോണം ഏറ്റവും മനോഹരമായി തന്നെ മലയാളികള്‍ ആഘോഷിക്കും. പുറത്തിറങ്ങിയുള്ള കൂടിച്ചേരലുകള്‍ കുറയുമെങ്കിലും തിരുവോണം ദിനം നല്‍കുന്ന ഉണര്‍വ്വും ഉന്മേഷവും ഒരു ദിവസത്തേക്കെങ്കിലും കോവിഡിനെ മാറ്റി നിര്‍ത്തുക തന്നെ ചെയ്യും.

പലരുടേയും പ്രീയപ്പെട്ടവര്‍ കോവിഡ് രോഗക്കിടക്കയിലും ക്വാറന്റൈനിലുമൊക്കെയായിരിക്കുന്ന സമയമായിരിക്കാം കടന്നു പോകുന്നത്. അതിനാല്‍ കുടുംബാംഗങ്ങള്‍ക്കൊപ്പം ഓണമാഘോഷിക്കുമ്പോള്‍ ഒരുമയുടെ സന്ദേശം അര്‍ത്ഥവത്താക്കുന്ന വിധം യാതനകളിലൂടെ കടന്നു പോകുന്ന സകലരേയും ഓര്‍ക്കാം. പ്രതിസന്ധികളെ നമ്മള്‍ അതിജീവിക്കുക തന്നെ ചെയ്യും. മാസ്‌കിന്റെ കാലം കടന്നുവെച്ച് ഊര്‍ജ്ജത്തോടെയുള്ള ഉത്രാടപ്പാച്ചിലും കടന്ന് അടുത്ത ഓണമെത്തുമ്പോള്‍ നമ്മള്‍ കോവിഡിനെ തീര്‍ച്ചയായും പടിക്ക് പുറത്താക്കിയിരിക്കും. കര്‍മ്മാ ന്യൂസിന്റെ എല്ലാ വായനക്കാര്‍ക്കും തിരുവോണ ദിനാശംസകള്‍…