കേരളയുടെയും കുസാറ്റിന്റെയും ഒറിജിനലിനെ വെല്ലുന്ന സർട്ടിഫിക്കറ്റുകൾ 10,000 രൂപ മുതൽ, വ്യാജന്മാരെ കണ്ടെത്തുക എളുപ്പമല്ല

കോട്ടയം: കേരളത്തിൽ വ്യാജ സർട്ടിഫിക്കറ്റുകൾ ലഭിക്കാൻ വലിയ ബുദ്ധിമുട്ടുകൾ ഇല്ലെന്ന ഞെട്ടിക്കുന്ന വിവരങ്ങളാണ് ഇപ്പോൾ പുറത്തു വരുന്നത്. കേരളത്തിലെ സർവകലാശാലകളുടേത് ഉൾപ്പെടെയുള്ള ഒറിജിനൽ ഡിഗ്രി സർട്ടിഫിക്കറ്റുകളുടെ മാതൃകയിലുള്ള വ്യാജ സർട്ടിഫിക്കറ്റുക ഓൺലൈനിലൂടെ നേടിയെടുക്കാൻ ആകും.

ഓൺലൈൻ വെബ്‌സൈറ്റുകൾ വഴി തയ്യാറാക്കി നൽകുന്ന ഇത്തരം സർട്ടിഫിക്കറ്റുകൾ ഒറിജിനലിനെ വെല്ലുള്ള തരത്തിൽ ഉള്ളവയാണ്. തിരിച്ചറിയാൻ പോലും സാധിക്കാത്ത രീതിയിലാണ് വ്യാജ സർട്ടിഫിക്കറ്റുകൾ നിർമ്മിക്കുന്നത്. കാണുന്നവർക്ക് ഇത് വ്യാജൻ ആണെന്ന ഒരു സംശയവും തോന്നില്ല.

കേരള സർവകലാശാലയുടെയും കുസാറ്റിന്റെയും സർട്ടിഫിക്കറ്റുകൾ ചില വെബ്‌സൈറ്റുകളിലുണ്ട്. ഇത്തരത്തിൽ വ്യാജ സർട്ടിഫിക്കറ്റുകൾ നിർമ്മിക്കുന്ന പ്രത്യേക സോഫ്റ്റ്വെയറുകളും ഗ്രാഫിക്‌സ് ഡിസൈനർമാരുമുണ്ട്. 10,000 രൂപ മുതലാണ് സർട്ടിഫിക്കറ്റുകൾക്ക് കൊടുക്കേണ്ടി വരിക. വ്യാജ സർട്ടിഫിക്കറ്റിന് നേഴ്‌സിങ് മേഖലയിലുൾപ്പെടെ ആവശ്യക്കാർ ഏറെയാണെന്നാണ് വിവരം.

വിദേശത്തേക്ക് റിക്രൂട്ട് ചെയ്യുന്ന ചില ഏജൻസികൾ കേന്ദ്രീകരിച്ചാണ് പല വ്യാജന്മാരും പ്രവർത്തിക്കുന്നത്.
മോഡൽ അയച്ചുകൊടുത്താൽ ഏത് സർവകലാശാലയുടെയും സർട്ടിഫിക്കറ്റ് വേണമെങ്കിലും ഇത്തരത്തിൽ കിട്ടും. വെബ്‌സൈറ്റുകളിൽ ഭൂരിഭാഗവും വിദേശ രാജ്യങ്ങൾ കേന്ദ്രീകരിച്ചായതിനാൽ നിയമ നടപടികളിലേക്ക് കടക്കുക എന്നതും പൊലീസിന് പ്രയാസമാകും.