ദേശീയപാതയ്ക്ക് പണം ചെലവിടുന്നത് കേരളം മാത്രമല്ല, മുഖ്യമന്ത്രിയുടെ പ്രസ്താവനയുടെ തൊലിയുരിച്ച് വി.മുരളീധരൻ

ന്യൂഡൽഹി. ദേശീയപാത വികസനത്തിനായി പണം ചെലവാക്കുന്ന ഏക സംസ്ഥാനം കേരളമാണെന്ന മുഖ്യമന്ത്രി പിണറായി വിജയന്റെ വാദം തെറ്റെന്ന് കേന്ദ്രമന്ത്രി വി.മുരളീധരൻ. മറ്റ് സംസ്ഥാനങ്ങൾ വഹിക്കുന്ന സാമ്പത്തിക ചെലവിന്റെ കണക്കുകൾ പുറത്ത് വിട്ടുകൊണ്ടാണ് മുഖ്യമന്ത്രിയുടെ കളവു പറയുന്ന പ്രസ്താവനയുടെ തൊലി കേന്ദ്ര മന്ത്രി ഉരിച്ചത്. ദേശീയപാത 66ന്റെ മാത്രമല്ല മുഴുവൻ ദേശീയപാതകളുടെയും ഭൂമിയേറ്റെടുക്കലിന്റെ 25% വഹിക്കാമെന്നാണ് കേരളം സമ്മതിച്ചതെന്ന് വി.മുരളീധരൻ പറഞ്ഞു.

കര്‍ണാടക, ദേശീയപാതക്ക് ഭൂമി ഏറ്റെടുക്കലിന്റെ 30 ശതമാനവും റിങ് റോഡുകള്‍ക്കും ബൈപ്പാസുകള്‍ക്കുമുള്ള ഭൂമി ഏറ്റെടുക്കലിന്റെ 50 ശതമാനവും തുക ചെലവഴിക്കുകയാണ്. തമിഴ്‌നാട്ടില്‍ നാല് ഹൈവേകളുടെ ഭൂമി ഏറ്റെടുക്കലിനും പുനരധിവാസത്തിനുമായി ചെലവാകുന്ന 470 കോടിയില്‍ പകുതി വഹിക്കുന്നത് സംസ്ഥാന സര്‍ക്കാർ തന്നെയാണ്. പഞ്ചാബിലും 50 ശതമാനം തുക സംസ്ഥാന സര്‍ക്കാര്‍ വഹിച്ചു. ഹിമാചല്‍ പ്രദേശ്, ഉത്തര്‍പ്രദേശ്, തെലങ്കാന, ഒഡിഷ തുടങ്ങിയ സംസ്ഥാനങ്ങളിലും 50 ശതമാനം വരെ തുക സംസ്ഥാന സര്‍ക്കാരുകള്‍ വഹിക്കുന്നു – വി.മുരളീധരൻ പറഞ്ഞു.

ദേശീയപാതാ നിര്‍മാണത്തിന്റെ ചെലവ് പൂര്‍ണമായും ദേശീയപാത അതോറിറ്റിയാണ് വഹിച്ചു വരുന്നത്. പാത നിര്‍മിക്കുന്നത് സംസ്ഥാന സര്‍ക്കാരാണെന്ന തരത്തിൽ പ്രചാരണം നടക്കുന്നു. ഇത് അടിസ്ഥാന രഹിതമാണ്‌. ഫ്ലക്സ് നിരത്തിയും ചാനൽ ചർച്ചകളിലൂടെയും തെറ്റായ അവകാശവാദം ഉന്നയിക്കുകയാണ്. മറ്റു സംസ്ഥാനങ്ങള്‍ക്ക് നല്‍കുന്നതിനേക്കാള്‍ കൂടുതല്‍ സഹായം കേന്ദ്രത്തിന്റെ ഭാഗത്തുനിന്ന് കേരളത്തിന് നൽകുന്നുണ്ട് – മുരളീധരൻ പറഞ്ഞു.