തലസ്ഥാനത്ത് 11 വയസുകാരിയെ തട്ടിക്കൊണ്ടുപോകാൻ ശ്രമം, വാ പൊത്തി കാറിൽ കയറ്റാൻ നോക്കി, തലനാരിഴയ്ക്ക് രക്ഷപ്പെട്ടു

തിരുവനന്തപുരം : ആറുവയസുകാരിയുടെ തിരോധാനത്തിൽ സംസ്ഥാനം നടുങ്ങിയിരിക്കെ തലസ്ഥാനത്ത് സമാനമായ തട്ടിക്കൊണ്ടു പോകൽ ശ്രമങ്ങൾ നടന്നതായുള്ള വിവരമാണ് ഇപ്പോൾ പുറത്തു വരുന്നത്. തിരുവനന്തപുരം വർക്കലയിലാണ് സമാന രീതിയിൽ മറ്റൊരു കുട്ടിയെ തട്ടിക്കൊണ്ടുപോകാൻ ശ്രമിച്ചത്. അയിരൂരിൽ 11 വയസുകാരിയെയാണ് തട്ടിക്കൊണ്ടുപോകാൻ ശ്രമിച്ചത്.

വെള്ള കാറിൽ എത്തിയ നാലംഗ സംഘമാണ് ‌സ്കൂളിലേക്ക് പോകാൻ നിന്ന കുട്ടിയെ വാ പൊത്തി കാറിൽ കയറ്റാൻ ശ്രമിച്ചത്. പെൺകുട്ടി ബഹളം വച്ചതോടെ വഴിയിൽ ഉപേക്ഷിക്കുകയായിരുന്നു. സംഭവത്തിൽ പെൺകുട്ടിയുടെ മാതാവ് പോലീസിൽ പരാതി നൽകിയിരുന്നതായാണ് വിവരം. കൊല്ലത്ത് ആറുവയസുകാരിയെ തട്ടികൊണ്ടു പോയതിന് പിന്നാലെ ഇത്തരത്തിലുള്ള നിരവധി വർത്തകളാണ് പുറത്തു വരുന്നത്.

ആറുവയസുകാരി അബിഗേലിനെ തട്ടിക്കൊണ്ടുപോയ ഓട്ടുമലയില്‍നിന്ന് 10 കിലോമീറ്റര്‍ അകലെ മറ്റൊരു കുട്ടിയെ തട്ടിക്കൊണ്ടുപോകാന്‍ ശ്രമം നടന്നതായുള്ള വിവരവും പുറത്തു വന്നു. സംഘംമുക്ക് താന്നിവിള പനയ്ക്കല്‍ ജംഗ്ഷനില്‍ സൈനികനായ ആര്‍ ബിജുവിന്റെയും ചിത്രയുടെയും ചൈത്രം വീട്ടിലാണ് ശ്രമം ഉണ്ടായത്.

ഇന്നലെ രാവിലെ 8.30ന് ആണ് സംഭവം. വീട്ടിനകത്തുനിന്നിരുന്ന 12 വയസ്സുള്ള മകള്‍ സിറ്റൗട്ടിലേക്ക് എത്തിയപ്പോള്‍ വീടിന് മുന്നില്‍ ചുരിദാര്‍ ധരിച്ച ഒരു സ്ത്രീ മുഖം മറച്ചു നില്‍ക്കുന്നതു കണ്ടത്. ആരാണെന്നു ചോദിച്ചപ്പോള്‍ പെട്ടെന്നു ഗേറ്റ് കടന്ന് ഓടി സമീപത്ത് ബൈക്കില്‍ കാത്തുനിന്ന ആളുമായി കടന്നു കളഞ്ഞു. സംഭവം സംബന്ധിച്ചു കുട്ടിയുടെ അമ്മ വൈകീട്ട് സാമൂഹിക മാധ്യമത്തില്‍ പോസ്റ്റിട്ട് ഒരു മണിക്കൂറിനു ശേഷമാണ് ഒായൂരില്‍ അബിഗേലിനെ തട്ടിക്കൊണ്ടുപോയത്.